Dowamy. Beýleki bölümleri şu salgylardan okap bilersiňiz:
- Giriş — 1-nji bölüm
- 2-nji bölüm
- 3-nji bölüm
- 4-nji bölüm
- 5-nji bölüm
- 6-njy bölüm
- 7-nji bölüm
- 8-nji bölüm
- 9-njy bölüm
- 10-njy bölüm
- 11-nji bölüm
- 12-nji bölüm
- 13-nji bölüm
- 14-nji bölüm
- 15-nji bölüm
- 16-njy bölüm
JIRARDYŇ «250» KANUNY
Müşderiler bilen iş salyşmak meselesinde pugta eýerýän bir düzgünim bar. Öňki bölümde gabat gelen her bir adama nähili psihologiki garaýyşlarda bolmalydygyny düşündirmäge çalşypdym. Belki-de siz: «Men söwdanyň piri, söwda-satuwyň ýyldyzy. Şonuň üçinem bu işimizde biderek wagtymyzy alýan, ýerliksiz güýmeýän adamlary ýa-da daşky keşbi, egin-eşigi, geýnişi, görnüşi maňzymyza batmaýan alyjylary ýanymyzdan kowup bileris» öýdýän bolsaňyz, bu juda ýalňyş pikir. Söwda-satuwdan gelýän girdeji maglumatlaryma göz aýlasaňyz, munuň beýle däldigine, beýle hereket etmeýändigime dessine düşünersiňiz.
Ýöne henizem şol pikirde saklanýan bolsaňyz, onda meniň nygtamak isleýän iň möhüm pikirime düşünmänsiňiz. Gabat gelen adamlar ýa-da alyjylar babatda nähili pikir edýänem bolsam, duýgularymyň edýän işime garyşmagyna asla maý bermeýärin. Biri hakdaky duýgularymyň hereketlerime täsir etmegine ýol beremok. Galyberse-de, biziň bu işimiz örän ünsli çemeleşilmeli möhüm iş; biz juda möhüm hünär bilen meşgullanýarys. Bu adamlar, geljekki alyjylar we hakyky müşderiler biziň üçin, biziň her birimiz üçin dünýädäki iň möhüm zat. Olar ýaşamagymyza, gün-güzeran aýlamagymyza, gazanç etmegimize asla päsgel berenoklar, gaýta hut şolar biziň kesbi-kärimiziň, gazanjymyzyň bereket çeşmesi. Eger-de biz şu zatlara düşünmesek, olaryň gadryny bilmesek, onda näme iş bilen meşgullanýandygymyza hem akyl ýetirmeýändigimiz bolýar. Özem men bu ýerde käbir müşderileri göz öňünde tutamok, men hemme müşderileriň hem biz üçin örän ähmiýetlidigini, bularyň ählisiniň bize gereklidigini ýaňzytmak isleýärin.
Indi size «Jirardyň «250» kanuny» diýip atlandyrýan zadymy düşündirip bereýin. Awtoulag söwdasyna başlanymdan köp wagt geçmänkä, bir matam dessuryna gatnaşmaly boldum. Ýakyn dostlarymyň biriniň ejesi ýogalypdy-da, şonuň jaýlanyş dessuryna gatnaşmak üçin gitmelidim. Katoliklerde, matam ýerinde görünmäge gelenleriň her birine döşlerine dakar ýaly merhumyň ady hem ýazylan hatyra suratlaryny paýlaýardylar. Men bu görnüşi öňem telim ýola görüpdim, ýöne surat paýlanyşy hakda şol wagta çenli hiç pikirlenip görmändim. Bir sowal biynjalyk etdi durdy. Ahyry matam dessuryny gurnaýan beýemçiden: «Bir gezekde näçerak suradyň gerek bolýandygyny nädip bilýäňiz?» diýip soradym. «Bu iş tejribämiň netijesi. Görünmäge gelenleriň Hatyra depderine ýazýan atlaryny we çekýän gollaryna üns berseňiz, merhum bilen hoşlaşmaga gelýänleriň ortaça sanynyň takmynan 250 adamdygyny görersiňiz. Her üýşmeleň-märekä ortaça 250 adam gelýär. Bizem her gezek şonça mukdardaky hatyra suratlaryny taýýarlaýarys we paýlaýarys» diýip, jogap berdi.
Bu wakadan köp wagt geçmänkä, edil şonuň ýaly jaýlanyş dessurlaryny gurnaýan protestant düşünjeli biri menden awtoulag satyn aldy. Ylalaşyk baglaşylyp, hemme meseläni birýüzli edenimizden soňra, özümi gyzyklandyrýan sowal bilen muňa hem ýüz tutdum. «Matam dessuryna merhum bilen hoşlaşmaga näçeräk adam gelýändigi» bilen gyzyklandym. Ol müşderi: «Takmynan 250 adam» diýip, gysgaça jogap berdi.
Soň men aýalym bilen bilelikde bir durmuş toýuna zyýapata gitdik. Dürli-dümen naz-nygmatlar bezelen toý zalynyň eýesiniň ýanyna baryp, «toýa näçerak adamyň gatnaşýandygyny» soradym. Ol: «Oglan tarapdan 250 töweregi, gyz tarapdanam 250 töweregi adam» diýip, jogap berdi.
Megerem, siz Jirardyň bu «250» kanunynyň nireden peýda bolandygyny eýýäm çakladyňyz öýdýän. Ýöne şonda-da has anyk aýdaýyn: Her kimiň durmuşynda 250 sany adam bar. 250 sany möhüm adam. Biziň esasy tanaýanlarymyzyň we gatnaşýanlarymyzyň sany takmynan şonça — 250. Toýa, üýşmeleňe çagyrmak üçinem, sadaka, märekä çagyrmak üçinem ýeterlik görülýän ortaça 250 adam!
Belki-de siz garasöýmez, terkidünýä ýa-da ýekemen adamlarda onça tanyş-biliş ýokdur diýersiňiz, ýöne men size muňa derek birnäçe adamlaryň 250-denem köpräk tanşynyň bardygyny hem aýdyp biljek. Bu bir adaty hasaplama, ýagny ortaça 250 adam diýildigi. Diýmek, men hepdede 50 sany adam bilen gabatlaşsam, iş salyşsam, olaryňam diňe ikisi meniň özümi alyp barşymdan, hereketlerimden, hödürleýän hyzmatlarymdan nägile bolsa, onda ýylyň ahyryna çenli şol ikisiniň gürrüňlerinden täsirlenip, men hakda başgaça pikir etjekleriň sany ortaça 5000 adamdan gowrak bolar. (Munuň hasaby şeýle: bir ýylda 50 töweregi iş hepdesi bar. olaryň hersinde 2 sany nägile müşderi peýda bolsa, olaryňam hersi özüniň 250 sany tanşynyň ýanynda siz hakda ýaramaz gürrüňler gozgasa, ýagny 50x2x250=25000, bir ýylda azyndan ýigrimi bäş müň adam siz hakda oňaýsyz pikir edip biljek ekeni).
(dowamy bar).
