Alymlar dünýäniň iň uly möý kerebini tapdylar. Ol 106 inedördül metr meýdany tutýar we gowagyň dar geçelgesiniň diwaryny doly örtýär. Bu tor müňlerçe örtükli kerep aýlawyndan ybarat bolup, «ýamalan düşek» ýaly görnüşi emele getirýär diýip, Live Science neşiri belleýär.
Bu ägirt uly kerep ilkinji gezek 2022-nji ýylda Çehiýanyň Speleologiýa jemgyýetiniň gowak gözlegçileri tarapyndan tapylypdy. Häzirki wagtda alym-arahnologlaryň (möý şekillileri öwrenijiler) ekspedisiýasy ony ilkinji gezek jikme-jik öwrenmäge mümkinçilik döretdi.
Barlaglaryň netijesine görä, bu möý «megapolisinde» iki dürli görnüşden ybarat bolan 111 müňden gowrak möý ýaşaýar. Ýagny öý möýi (Tegenaria domestica), başgaça aýdanda, ammar möýi ýa-da kerep örýän möý, hem-de ondan ownuk görnüşli möýler, ýagny Prinerigone vagans. Alymlar birinji görnüşden 69 müň, ikinji görnüşden bolsa 42 müňden gowrak bardygyny hasaplapdyrlar.
«Bu iki görnüşiň şeýle ägirt uly mukdarda bir gurluşda bile ýaşamagy örän seýrek duş gelýän hadysa» diýip, Rumyniýadaky Sapienția Transilwaniýa uniwersitetiniň alymy we barlagyň ýolbaşçysy Iştwan Urak belleýär.
Adatça, öý möýi özünden kiçi görnüşli möýleri awlardy, emma gowagyň garaňky ýerinde olaryň görüş ukyby gowşandygy sebäpli, bu ýerde iki görnüş hem mikrobedenjikleriň bioplýonkalary bilen iýmitlenýän ownuk çybynlar bilen iýmitlenýär.
Bu möýleriň ekoulgamynyň ýerleşýän ýeri ýerasty suwlardaky wodorod sulfidiniň oksidlenmeginden emele gelen kükürtli gowakdyr. Gowagyň içinden geçýän kükürtli çeşme möýleriň we beýleki jandarlaryň ýaşaýşyny goldaýar. Molekulýar barlaglaryň netijesinde gowak möýleriniň ýeriň üstündäki möýlerden tapawutlanýandygy anyklandy, bu bolsa olaryň uzak ýyllaryň dowamynda ekstremal şertlere uýgunlaşandygyny görkezýär.
