Indi 105 ýurduň raýatlary Gazagystana girmek üçin ilçihana barmazdan elektron wiza resmileşdirip bilýärler. Bu barada Orda.kz neşiri ýurduň Içeri işler ministri Jeržan Sadenowyň sözlerine salgylanyp habar berýär.
Ministriň bellemegine görä, ýurt IT-hünärmenleri üçin «Digital Nomad Visa» (Sanly göçüp-gonup ýaşaýanlaryň wizasy) we syýahatçylar üçin «Neo Nomad Visa» (Täze göçüp-gonup ýaşaýanlaryň wizasy) berip başlady. Myhman kabul edýän tarap daşary ýurtly raýatyň gelendigi barada migrasiýa edaralaryna onlaýn tertipde habar berip biler.
– Aeroportlarda we uly serhet geçelgelerinde QR-kodly «syýahatçylyk kartlary» berilýär. Olarda bolmagyň düzgünleri, gyssagly kömek gulluklarynyň we aragatnaşyk operatorlarynyň telefon belgileri barada zerur maglumatlar ýerleşdirilen. Mundan başga-da, «QazETA» atly ykjam goşundy döredilýär. Onuň kömegi bilen daşary ýurtlylar şahsy belgini resmileşdirmekden başlap, migrasiýa hyzmatlarynyň köpüsinden peýdalanyp bilerler. Häzirki wagtda parlament tarapyndan kanunçylyga degişli üýtgetmeler seredilýär – diýip, Sadenow täze düzgün hakynda giňişleýin belleýär.
Mundan başga-da, Içeri işler ministrligi syýahatçylyk polisiýasynyň mümkinçiliklerini giňeltmegi we syýahatçylyk desgalaryndaky wideogözegçilik ulgamlaryny içeri işler edaralarynyň operatiw dolandyryş merkezlerine birikdirmegi teklip edýär.
