«Mançester Siti» toparynyň we Özbegistanyň milli ýygyndysynyň goragçysy Abdukodir Husanow Transfermarkt internet portalynyň täze maglumatlaryna görä, Aziýanyň iň gymmat bahaly futbolçysyna öwrüldi. Portal oýunçynyň esasy bazar bahasyny 50 million ýewro derejesinde kesgitleýär.
Soňky ýarym ýylyň dowamynda özbegistanly futbolçynyň transfer bazaryndaky nyrhy 15 million ýewro ýokary galdy.
Husanow fransuzlaryň «Lans» toparyndan transfer bolanyndan soň, 2025-nji ýylyň ýanwar ayndan bäri iňlis klubunda çykyş edip gelýär. Onuň «şäherliler» bilen baglaşan şertnamasynyň möhleti 2029-njy ýylyň tomsuna çenli dowam eder.
Aziýanyň iň gymmat futbolçylarynyň sanawynda ikinji orny «Maýns» toparynda oynaýan ýaponiýaly ýarym goragçy Kaişu Sano eýeleýär (40 million ýewro). Üçünji ýerde bolsa «Real Sosedad» toparynyň oýunçysy Takefusa Kubo durýar, onuň häzirki bahasy 30 million ýewro barabardyr.
Husanow öňümizdäki 2026-njy ýylyň Dünýä çempionatynda Özbegistanyň milli ýygyndysynyň düzüminde meýdança çykar.
