Britaniýanyň ulag polisiýasy Londondan, takmynan, 100 km demirgazykda iki otlynyň çaknyşmagy netijesinde maşinistiň heläk bolandygyny we 89 adamyň dürli derejeli şikesleri alandygyny habar berdi.
BBC-niň bellemegine görä, gyssagly kömek gulluklary anna güni ýerli wagt bilen sagat 17:15 töwereklerinde Bedford şäheriniň günortasyndaky demirýol şahasyna çagyryldy, bu ýerde East Midlands Railway kompaniýasyna degişli iki sany otly çaknyşdy. Otlularyň ikisi hem Londonyň «Sent-Pankras» wokzalyna tarap barýardy. Wakanyň sebäpleri häzirki wagtda derňelýär.
Ýolagçylaryň biriniň sosial torlarda paýlaşan wideosyna görä, otlularyň biri öň tarapy bilen beýleki otlynyň yzyndan urupdyr. Wakanyň bolan ýerinden düşürilen suratlarda iň azyndan bir wagonyň relsden çykandygy görünýär.
«Meniň bar pikirim, gynansak-da, wepat bolan adamyň maşgalasy we agyr şikes alanlar bilen» – diýlip, Beýik Britaniýanyň premýer-ministri Kir Starmeriň beýanatynda aýdylýar.
Gündogar Angliýanyň tiz kömek gullugy wakanyň bolan ýerine 20-den gowrak tiz kömek ulagynyň we alty sany tiz kömek dikuçarynyň ugradylandygyny habar berdi.
Reuters agentliginiň maglumatyna görä, bir adam wakanyň bolan ýerinde aradan çykdy, 11 adam örän agyr, 22 adam agyr, 56 adam bolsa ýeňil şikes aldy.
