Ertir 23-nji gezek geçirilýän futbol boýunça dünýä çempionatynyň toparçalaýyn tapgyrynyň iň gyzykly oýny bolar. Gürrüň Braziliýa bilen Marokkanyň arasynda geçiriljek duşuşyk hakynda barýar. Geliň, bu netijäni FIFA nyň milli ýygyndylar boýunça dowamly hödürleýän sanawy esasynda delillendirmäge çalşalyň.
Häzirki wagtda FIFA-nyň sanawyna görä iň güýçli 10 ýygyndynyň tertibi şeýleräk görnüşde durýar:
1.Argentina (1877.27 utuk);
2.Ispaniýa (1874.71 utuk);
3.Fransiýa (1870.70 utuk);
4.Angliýa (1828.02 utuk);
5.Portugaliýa (1767.85 utuk);
6.Braziliýa (1765.86 utuk);
7.Marokko (1755.10 utuk);
8.Niderlandlar (1753.57 utuk);
9.Belgiýa (1742.24 utuk);
10.Germaniýa (1735.77 utuk).
Görnüşi ýaly, “C” toparçadan orun alan Brazilýa bilen Marokkonyň ýygyndylary bu sanawda hem iň ýakyn bäsdeş. Aslynda-da Braziliýanyň ýygyndysyna jahan çempionatynyň mümkingadar ýeňijileriniň biri hökmünde garalýar. Toparyň ýyldyzlary ýetik bolsa-da, olara düzgün-tertip ýetmezçilik edýärdi. Ýöne Karlo Ançelottiniň gelmgi bilen bu meseläniň hem çözgüdi tapylar. Marokko bolsa geçenki Dünýä çempionatyň şowhun turuzan topary we eminiň karary bilen hem bolsa, herniçik-de Afrikanyň Milletler Kubogynyň eýesi.
Toparlar öňem bir ýola gabatlaşypdylar we ol duşuşyk, baryp-ha, 1998-nji ýylyň Dünýä çempionatynda bolup geçipdi. Şol gezek braziliýalylar marokkalylary derbi-dagyn edipdiler. Ýeňiş getiren üç goly bolsa Ronaldo, Riwaldo we Bebeto salypdy.
Ikinji we soňky gezek bolsa toparlar beýle bir öňem däl, 2023-nji ýylyň martynda «didarlaşdylar». Ýoldaşlyk duşuşygy bolsa-da, toparlar oýna çynlakaý girişdiler. Netijede çekeleşikli hem dözümli geçen oýunda ýeňiş marokkalylaryňkylyk boldy we 2:1 hasap bilen hut şolaryň peýdasyna-da tamamlandy.
Ine, şu ýagdaýlary göz öňünde tutanyňda hem, ertirki oýnuň nähili jemlenjegi hakynda öňünden belli bir zat aýtmak örän çetin.
Oýnuň geçiriljek güni hem wagty 14-nji iýun, sagat 03:00.
Şeýle-de günüň beýleki gyzykly oýunlary
Awstraliýa:Türkiýe. Şonuň ýaly-da, şu sanawda Awstraliýa bilen Türkiýäniň arasyndaky oýnuňam diýseň dartgynly bolmagyna garaşylýar.
Oýniň geçiriljek güni hem wagty 14-nji iýun, sagat 09:00.
Germaniýa — Kýurasao
Bularyň tersine, dereje taýdan biri-birinden iň uzakda durýan toparlaryň duşuşygy bolsa “E” toparçada hasaba alyndy. Bu ýerde dünýä reýtinginde 10-njy ýerde durýan Germaniýanyň ýygyndysy bilen 83-nji orundaky Kurasaonyň ýygyndysy garşylaşar. Häzirki wagtda bu görkeziji turnirdäki bäsdeşleriň arasyndaky iň uly aratapawutdyr.
Oýnuň geçiriljek güni we wagty: 14-nji iýun, sagat 22:00.
