Özbegstanyň Buhara welaýatynyň «Şurbulak» diýlen ýerinde soňky ýarym ýylyň dowamynda meýdany takmynan 80 inedördül kilometr bolan täze köl emele geldi. Bu suw howdanynyň döremegini sebitde ýagnyň mukdarynyň kadadan tas üç esse köp bolmagy bilen baglanyşdyrylýar.
Suw howdany Peşkun etrabynyň Gazly şäherçesiniň demirgazygynda, öň gurak ýer hasaplanýan künjekde döredi. Özbegistanyň Ekologiýa partiýasynyň berýän maglumatlaryna görä, köl özüniň göwrümi boýunça Buhara şäheriniň meýdanyndan hem uly bolup, ýurduň iri gidrologik desgalary bilen bäsleşip biljek derejededir.
Hünärmenler bu suw howdanynyň emele gelmegine diňe bir tebigy şertleriň däl, eýsem başga ýagdaýlaryň hem täsir edendigini belleýärler. Suw hojalygy ministrliginiň sebitde balykçylygy ösdürmek boýunça maksatnamalarynyň çäginde ýörite kanallar çekilip, olar arkaly köle ýerasty suwlar akdyrylypdyr. Köli suw bilen üpjün edýän kollektor kanalynyň uzynlygy takmynan 126 kilometre ýetýär.
Ekologlar çöl zolagynda şeýle uly suw howdanynyň peýda bolmagynyň sebitiň ekoulgamy we suw üpjünçiligi babatda hem oňyn üýtgeşmelere, şonuň bilen bir wagtda käbir töwekgelçiliklere-de getirip biljekdigini çaklaýarlar.
