Bütindünýä Saglygy Goraýyş Guramasynyň (BSGG) Ýewropa býurosynyň direktory Hans Klýuge Ýewropada soňky dört ýylda aşa yssy howa zerarly 200 müňden gowrak adamyň heläk bolandygyny mälim etdi. Ol bu ýagdaýlaryň köpüsiniň öňüni alyp bilinjekdigini-de aýratyn belledi.
Guramanyň berýän maglumatlaryna görä, aşa yssy howa tolkunlary indi seýrek bolýan hadysa däl-de, saglygy saklaýyş ulgamyna we infrastruktura uly agram salýan yzygiderli bökdençlige öwrüldi. Ýewropa dünýäde global maýlamanyň netijelerinden iň köp ejir çekýän we iň ejiz sebitleriň biri bolmagynda galýar.
Yssy howa sebäpli iň köp pida Italiýada hasaba alyndy. Ondan soňky orunlarda bolsa Ispaniýa, Germaniýa we Gresiýa durýar. Şunda ilatyň her bir million adamyna düşýän ölüm sany boýunça iň ýokary görkeziji Gresiýada bellenildi.
BSGG yssy howa we saglyk ugrundaky hereket meýilnamalary boýunça täzelenen gollanmasyny hödürledi. Teklip edilýän çäreleriň arasynda şäherleri ýaşyl zolaklara öwürmek, salkynladyş merkezlerini döretmek, garry adamlara kömek bermek we hünärmenlere Gün urma alamatlaryny wagtynda aňmagy öwretmek ýaly anyk ädimler bar.
