Soňky iki ýarym ýylyň dowamynda Hazar deňzine jemi 35 milliard kubmetrden gowrak suw gönükdirildi. Bu barada Gazagystanyň Suw serişdeleri we suwaryş ministri Nuržan Nuržigitowa salgylanýan Zakon.kz portaly habar berýär.
Žaýyk-Kaspi basseýn inspeksiýasynyň berýän görkezijilerine görä, şol umumy möçberiň 17 milliard kubmetrden gowragy 2024-nji ýylda, ýagny sebitde aşa uly suw joşgunlary hasaba alnan döwründe deňze guýdy. Üstümizdäki ýylyň başyndan bäri bolsa deňze akdyrylan suwuň möçberi 6,16 milliard kubmetre deň boldy.
Ministr Gazagystanyň Atyrau oblastynyň ýaşaýjylary bilen geçiren duşuşygynda 2025-nji ýylyň netijeleri boýunça sebitde ýagyş ýagdyryjy we damjalaýyn suwaryş ulgamlaryny ulanmak arkaly 9,3 müň gektar ýeriň suwarylandygynyhem mälim etdi. Bu döwrebap çäre 12,8 million kubmetr suwy tygşytlamaga mümkinçilik berdi. Şu ýyl bolsa suw tygşytlaýjy tehnologiýalar goşmaça ýene-de 800 gektar meýdanda ornaşdyryldy.
