Ýylda geçirilýän üçünji Nature and Humans Photo Competition surat bäsleşiginiň netijeleri yglan edildi. Oňa dünýäniň 49 ýurdundan we sebitinden suratçylar gatnaşdylar. Şu ýylky halkara eminler toparyna meşhur ispaniýaly tebigat suratçysy Artur de Frias ýolbaşçylyk etdi.
Görkezilen işler adamyň janly tebigat bilen gatnaşygynyň iki gapma-garşy tarapyny açyp görkezýär: senagat maldarçylygyny ösdürip ýetişdirmegiň rehimsiz usullaryndan başlap, ýabany haýwanat dünýäsiniň gözelligini tutuş ajaýyplygy bilen açmaklyga çenli.
Ösüşiň garaňky tarapy: “Tebigaty goraýyş suratçylygy” nominasiýasy
Ýeňiji suratlar tapgyrynda human.cruelties lakamly haýwan hukuklary boýunça ylmy barlagçy ýeňiji boldy. Onuň "Gizlin zady açmak bilen" atly taslamasy senagat maldarçylygynyň gizlin taraplaryny açyp görkezýär: doňuzlar saklanýan dar metal torlar, maldan hyryn-dykyn fermalar, infragyzyl lampalaryň aşagyndaky täze doglan doňuz çagalary we bu şertleri dokumentleşdirýän aktiwistleriň we gözegçileriň alyp barýan işleri. Kadrlar köp sarp edijileriň gözünden gizlenip saklanýan, haýwanlaryň çekýän jebirlerini görkezýär.
Fransisko Negroni "Şemalda gygyrmak" atly suraty bilen ýekebara kategoriýasynda birinji orny eýeledi. Suratda otluklaryň fonunda tikenli simiň üstünden bökýän puma görünýär. Ýyrtyjynyň göwresi hakykatdanam haýadyň ýokarky hatarynda ýerleşýär we bu haýwanat dünýäsi bilen adam tarapyndan döredilen päsgelçilikleriň arasyndaky çaknyşygy alamatlandyrýar.
Hawýer Mursiýa şol kategoriýanyň Ispaniýa bölüminde "Men gazly içgi isleýärin" atly eseri bilen ýeňiji boldy. Suratda suwuň ýüzünde iki sany taşlanan alýumin bankany tutguçlary bilen gysyp duran osminog görkezilýär, bu bolsa ummanyň hapalanmagy meselesiniň aýdyň mysalydyr.
Ýabany tebigatyň ajaýyplygy: “Planetanyň gözelligi”, “Guşlar” we “Ummanlar”
"Planetanyň gözelligi" kategoriýasyndaky baş baýraga Daniel Walwerde "Iýip otyrkaň silkinmek" atly suraty üçin mynasyp boldy. Suratda boz aýy awlan balygy bilen derýada oturyp, töweregine suw syçradýar.
Şol suratçy iki iberiýa garagulagynyň arasyndaky gazaply darkaşy suratlandyrýan “Rüstemlik ugrundaky göreş” kadry bilen "Ispaniýanyň gözelligi" kategoriýasynda ýeňiji boldy.
Andrea Izzottiniň "Jübtün awlamak" diýen işi "Guşlar" kategoriýasynda ýeňiji diýlip yglan edildi. Suratçy suwasty gaýanyň daşyndan aýlanyp ýören we guşlaryň Gün şöhlesiniň içinden parran geçip şol ýere çümýän ägirt uly balyk sürüsini surata düşüripdir.
Beýleki kategoriýalaryň arasynda emin agzalary aşakdaky işleri belläp geçdiler:
“Ummanlar”: Lesli Roçatyň "Deňiz otlary tokaýlygynyň arwahy" atly eserinde ägirt uly suw otlarynyň arasynda ýüzüp ýören akula görkezilýär.
“Beýleki haýwanlar”: Lalita Ekanaýakeniň "Gizlenmegiň ussady" atly eserinde ýaprak guýrukly gekkonyň agaç gabygy bilen utgaşyp gidýändigi görkezilýär.
“Peýzaž”: Hawýer Herransyň gara-ak reňkli, syrly "Fliş" fotosuratynda dumanly deňiz howasynda ýitip gidýän ketik gaýalar görkezilýär.
Ýaşlar nominasiýalary
Ýaşlar kategoriýasynda Joffre Kutal Gallifa "Utanç" atly täsirli suraty bilen ýeňiji boldy. Suratda agaç kapasanyň deşiginden asma gulpa penjesini ýetirmäge synanyşýan maýmyn görkezilýär.
Alberto Roman Gomes bäsleşigiň iň ýaş ýeňijisi diýlip yglan edildi. Onuň "40 gradusda demiňi dürsemek" atly ýönekeý ak-gara suraty gamaşyk asmanyň fonunda ýalaňaç şahada oturan kiçijik guşy suratlandyrýar.
Nature and Humans Photo Competition surat bäsleşiginiň guramaçylary bize tebigaty goramak suratçylygynyň ekologiýa bilimi üçin güýçli gural bolmagynda galýandygyny ýatladýarlar, sebäbi adam tebigatyň esasy goragçysy-da, oňa howp salýan çeşme-de bolup bilerler.
Dördünji bäsleşik üçin arzalary kabul etmek başlandy we ol 2026-njy ýylyň 28-nji sentýabryna çenli dowam eder.
