Balhaş şäherinde geçirilen «Balkhash Tour Fest — 2026» festiwalynda Gazagystanyň täze resmi gastronom rekordy bellige alyndy. Ýerli aşpezler tomaşaçylaryň we myhmanlaryň gözüniň alnynda ägirt uly «kazyburger» taýýarladylar. Bu üstünlik Gazagystanyň Rekordlar kitabyna girizildi.
Rekord gazanan tagamyň ölçegleri aşakdakylardan ybarat boldy:
- Agramy: 86,4 kilogram;
- Diametri: 89 santimetr;
- Beýikligi: 39 santimetr.
Ägirt uly kazyburgeri taýýarlamak üçin aşpezler örän köp mukdarda önüm ulandylar. Tagamyň düzümine birbada et önümleriniň birnäçe görnüşi: ýylky etinden edilen şöhlat, sygyr eti we towuk eti goşuldy. Şeýle hem onda täze pomidorlar, gök önümler we ýörite taýýarlanan sous hem ulanyldy.
Aşpezler diňe bir rekord goýmagy däl, eýsem burgeriň ýokary hilli tagamyny hem doly saklap galmagy maksat edinendiklerini nygtadylar. Gurnaýjylar resmi taýdan rekord belligne alnandan soň, ägirt uly höregi böleklere bölüp, mätäçler üçin Balhaşyň haýyr-sahawat gaznalaryna ugratdylar.
«Balkhash Tour Fest» festiwalynyň çäginde geçirilýän şeýle aşhana taslamalary Gazagystanyň tagam däplerini wagyz etmek, ýerli we daşary ýurtly syýahatçylary çekmek, şeýle-de Balhaş sebitiniň syýahatçylyk mümkinçiliklerini görkezmek üçin gurnalýar.
