Angliýanyň milli ýygyndysy ABŞ-da geçiriljek dünýä çempionatynyň başlanmagynyň öňüsyrasynda sport lybaslarynyň we enjamlarynyň ogurlanmagy bilen ýüzbe-ýüz boldy. Britaniýanyň «Daily Mail» gazetiniň ýazmagyna görä, bu waka toparyň ilkinji türgenleşiginiň öňüsyrasynda Kanzas-Siti şäherinde bolup geçdi.
Neşiriň berýän maglumatlaryna görä, näbelli adamlar furgondan futbolçylaryň oýun butsylaryny, ýaryşyň resmi toplaryny we türgenleşik enjamlarynyň bir bölegini ogurlapdyr. Çeşmeleriň tassyklamagyna görä, ogurlykdan soň ulagda diňe birje top galypdyr. Şeýle hem ýiten zatlaryň arasynda toparyň kapitany Harri Keýniň we ýarymgoragçy Jud Bellingemiň butsylary hem bardyr diýlip howatyr edilýär.
Howpsuzlyk gullugy bu waka enjamlary daşamak tabşyrylan sürüjileriň gatnaşygynyň bolup biljekdigi baradaky pikir ýöretmeleri gözden geçirýär. Häzirki wagtda Angliýanyň Futbol assosiasiýasy ýerli polisiýa bilen bilelikde ogurlanan zatlary yzyna gaýtarmagyň üstünde işleýär.
Kanzas polisiýasynyň wekili bolsa güman edilýän iki adamyň derňew işleri tamamlanýança tussag edilendigini habar berdi.
Tomas Tuheliň ýolbaşçylygyndaky topar ýaryşdaky ilkinji duşuşygyny 18-nji iýunda (gije sagat 01:00-da) Horwatiýanyň ýygyndysyna garşy geçirer. Şondan soň iňlisler 23-nji iýunda Gana, 28-nji iýunda bolsa Panama bilen oýnar.
