ABŞ-da kazyýet Ak tamyň çäginde meýilleşdirilýän Absolýut söweş çempionatynyň (UFC) tutluşyklaryny ýatyrmak baradaky şikaýat arzasyny ret edip, degişli çäräniň geçirilmegini makullady. Bu barada resminama salgylanyp, «RIA Nowosti» habar berýär.
Bu sport ýaryşy 14-nji iýunda geçiriler we ol 4-nji iýulda belleniljek Amerikanyň Birleşen Ştatlarynyň döredilmeginiň 250 ýyllygyna bagyşlanar. Çäräniň geçirilýän güni bolsa ABŞ-nyň Prezidenti Donald Trampyň doglan gününe gabat gelýär, şol gün onuň ýaşy 80 dolýar. Public Integrity Project hukuk goraýjy guramasy iýun aýynda iki raýatyň adyndan ýaryşy ýatyrmak barada kazyýete şikaýat edipdi. Ol häkimiýetleriň bu çäräni Kongres bilen ylalaşman kanuny bozandyklaryny, şeýle hem şikaýatçylaryň «estetik duýgularyna» zyýan ýetirendigini öne sürüpdi.
«Şikaýatçylaryň wagtlaýyn gadaganlyk baradaky gyssagly haýyşnamasy ýa-da muňa alternatiwa hökmünde gyssagly deslapky kazyýet gadaganlygyny girizmek baradaky arzasy ret edilýär» – diýlip, resminamada aýdylýar.
15-nji iýunda geçiriljek ýaryşyň esasy duşuşygynda ýeňil agramda UFC-niň guşagynyň eýesi, asly gruziýaly bolan ispaniýaly söweşiji Iliýa Topuriýa amerikaly söweşiji Jastin Getjä garşy ilkinji titul goragyny geçirer.
