Saud Arabystanynyň Futbol federasiýasy öz milli ýygyndysynyň janköýerleri üçin 2026-njy ýylda geçiriljek futbol boýunça Dünýä çempionatynyň oýunlaryna mugt petek paýlamak çäresine başlady. Bu hakda Saud Arabystanynyň ABŞ-daky ilçihanasynyň resmi sahypasynda habar berildi.
Bu karar Halkara futbol federasiýasynyň turnire geljek janköýerleriň sanynyň az bolaýmak ähtimallygy bilen bagly aladalarynyň täsirinde kabul edildi.
«Futbol boýunça Dünýä çempionatyna sanaýmaly gün galdy. Şu mynasybetli Saud Arabystanynyň Futbol federasiýasy ABŞ-nda okaýan ýa-da ýaşaýan Saud Arabystanynyň ýygyndysynyň janköýerlerine mugt petekleri hödürleýär. Senden gatnaşmak, bizden bolsa petekler» diýlip, guramanyň habarynda bellenilýär.
Mundialda Saud Arabystanynyň milli ýygyndysy «H» toparynda çykyş eder we ol ýerde Urugwaýyň, Ispaniýanyň hem-de Kabo-Werdeniň ýygyndy toparlaryna garşy oýnar.
2026-njy ýylyň Dünýä çempionaty 11-nji iýun — 19-njy iýul aralygynda geçiriler. Duşuşyklar bir wagtda üç ýurtda — ABŞ-nda, Kanadada we Meksikada bolar. Turniriň oýunlaryna petekleriň bahasy 100 dollardan 6370 dollara çenli üýtgeýär.
Öňümizdäki çempionat dünýä futbolunyň taryhynda 48 sany milli ýygyndynyň gatnaşmagynda geçiriljek ilkinji ýaryş bolar.
