HBO kompaniýasy «Aždarhanyň öýi» (House of the Dragon / Дом Дракона) serialynyň üçünji möwsüminiň premýerasynyň öňüsyrasynda Londonyň Tauer galasynyň üstünden mehaniki aždarhany uçurdy.
«Bu guşmy? Uçarmy? Ýok, bu Londonyň asmanynda pelpelläp ýören Siraks» – diýip, kompaniýa özüniň X sosial torundaky sahypasynda ýazdy.
«Wales Online» portalynyň habar bermegine görä, agramy 13 kilogram, uzynlygy bolsa 8 metr bolan aždarhany Germaniýanyň Airstage awiasiýa kompaniýasy döretdi. Ol 23 sany hereketli bölekden ybarat bolup, onuň asmanda uçuşy ganatyna we aýaklaryna gurnalan perler arkaly üpjün edilýär. Aždarhany ýasamak üçin üç aý wagt sarp edildi.
Airstage-iň operasion direktory Nils Şlenter bu taslamanyň kompaniýanyň taryhyndaky iň çylşyrymlylaryň biri bolandygyny aýdýar. Ol birnäçe aýlap dowam eden barlaglardan we gurnamalardan soň, serialdaky Siraks atly aždarhanyň hereketlerini mümkingadar takyk gaýtalamak üçin 7-den gowrak synag uçuşynyň geçirilendigini belledi.
Siraksyň Britaniýanyň paýtagtynyň taryhy merkeziniň asmanynda peýda bolmagy, «Aždarhanyň öýi» serialynyň täze möwsüminiň çykmagyna gabatlanan iň iri mahabat çäreleriniň biri boldy.
«Aždarhanyň öýi» Jorj Martiniň kitaplaryna esaslanýan meşhur «Tagtlaryň oýny» serialynyň spin-offy we prikwelidir.
