Berliniň birnäçe etrabynda meşe (dub) ýüpek gurçugynyň köpçülikleýin ýaýramagy dowam edýär. Şol sebäpli häkimiýetler Şarlottenburg-Wilmersdorf okrugyndaky sport desgalaryny we ýaşyl zolaklary ýapmaga mejbur boldular.
Iň köp ejir çeken etraplaryň ýaşaýjylary mör-möjeklere garşy gyssagly çäreleri görmegi talap edýärler. Ýagdaýyň iň çylşyrymlysy Ýungfernhaýde sebitinde emele geldi. Ýerli ýaşaýjylaryň aýtmagyna görä, gurçuklaryň gijilewük döredýän tüýleri awtoulaglarda, öýleriň bassyrmalarynda, gapylaryň çarçuwalarynda we köçe çyralarynda hem duş gelýär.
Etrap ýygnagynyň deputaty Niko Kaufman B.Z. gazetine beren maglumatynda gartaşan adamlaryň öýden çykmaga gorkýandygyny, çagalaryň endamynda bolsa gabarçak görnüşli örgünleriň peýda bolýandygyny habar berdi.
Gurçuklaryň düzüminde taumetopoýin belogyny saklaýan mikroskopik tüýler howp döredýär. Olar ýel arkaly aňsatlyk bilen ýaýraýar we derä, gözlere ýa-da dem alyş ýollaryna düşende gijilewüge, örgüne, ýellenmä, dem alşyň kynlaşmagyna getirip bilýär. Gurçuklar öz höwürtgelerini terk edenden soňam, olaryň tüýleri öz täsirini ýitirmeýär.
Sanitariýa gulluklary bejeriş işlerini geçirmeýärler, sebäbi meşe ýüpek gurçugy däp bolan zyýankeşleriň toparyna girmeýär, şeýle-de biosidleriň ulanylmagy ösümlikleri goramak edarasynyň talaplaryna görä çäklendirilendir.
Howply ýagdaýa jogap edip, ýaşaýjylar Ýungfernhaýde we tutuş Berlin üçin gorag meýilnamasyny işläp düzmegi talap edýän köpçülikleýin ýüzlenmä başladylar
