Shakarim University ýokary okuw mekdebiniň mugallymy Kaýrat Kabyşew 5 sagat 29 minudyň dowamynda gazaklaryň 102 sany halk aýdymyny ýerine ýetirip, dünýä rekordyny goýdy. Bu üstünlik Aziýanyň we Afrikanyň etnomedeniýet ugrundaky Dünýä rekordlar kitaby tarapyndan resmi taýdan hasaba alyndy.
Çäre Abaý sebitinde, gazaklaryň gadymy aýdym-saz sungatyny daşary ýurtlarda giňden dabaralandyrmak maksady bilen geçirildi. Sazanda ähli eserlerini notasyz, ýazgysyz, fonogrammasyz we öz saz guralynda saz çalmak arkaly utgaşdyryp ýerine ýetirdi.
Düzgüne görä, her 25 aýdymdan soň 15 minutlyk dynç alyş göz öňünde tutulsa-da, ýerine ýetiriji dynç almakdan ýüz öwürdi. Rekordyň hasaba alynmagynyň netijeleri boýunça Kaýrat Kabyşewe resmi şahadatnama we kümüş medal gowşuryldy.
Bu üstünlik Aziýanyň we Afrikanyň Dünýä rekordlar kitabynyň 2026-njy ýyldaky neşirine giriziler.
