Las-Wegasda mekdep okuwçylary we ýerli ýaşaýjylar düşek örtgülerini ulanmak arkaly dünýäde iň uly galany (fort) gurdy. Bu netije resmi taýdan Ginnesiň rekordlar kitabyna girizildi.
Umumy meýdany 14 103 inedördül futa (takmynan, 1310 inedördül metr) barabar bolan bu gurluş şäheriň jemgyýetçilik merkeziniň basketbol meýdançasynyň bütin çägini eýeledi.
Bu taslamanyň gurluşyny «West Career & Technical Academy» mekdebiniň inženerçilik ugrunyň okuwçylary oýlap tapdy. Galany gurmak üçin ýüzlerçe örtgüler, palata diregleri, ýüpler, turbalar we kanselýariýa gysgyçlary ulanyldy. Gurluşyk işlerine köp sanly meýletinçiler hem işjeň gatnaşdy.
Rekordy resmi taýdan tassyklamak üçin Ginnesiň rekordlar kitabynyň wekili gurlan galanyň ähli talaplara laýyk gelşini barlady. Şol sanda, örtgüleriň arasynda uly boşluklaryň bolmazlygy, olaryň ýere degip durmagy we adamlaryň içinde arkaýyn hereket edip bilmegi üçin içki beýikliginiň ýeterlik derejede bolmagy ýaly şertlere aýratyn üns berildi.
Mundan ozalky dünýä rekordy 2024-nji ýylda Günorta Karolina ştatynda goýlupdy. Şol wagt gurlan meňzeş galanyň meýdany 12 291 inedördül futa (takmynan, 1140 inedördül metr) barabar bolupdy.
