Beýik Britaniýanyň hökümeti 16 ýaşyna ýetmedik çagalaryň sosial torlardan peýdalanmagyny gadagan etmäge taýýarlyk görýär. Täze düzgünleriň 2027-nji ýylyň başynda güýje girmegine garaşylýar diýip, «BBC» habar berýär.
Premýer-ministr Kir Starmer bu ädimiň «Beýik Britaniýa üçin dogry» boljakdygyny hem-de çagalaryň internet gurşawyndaky howpsuzlygyny üpjün etmäge ýardam berjekdigini belledi. Çäklendirmeler Snapchat, TikTok, YouTube, Instagram, Facebook we X ýaly platformalara degişli bolup biler. Hyzmatlaryň gutarnykly sanawy entek resmi taýdan çap edilmedi.
Hökümetiň meýilnamalaryna laýyklykda, platformalar 16 ýaşdan kiçi bolan ulanyjylara göni ýaýlymlary geçirmegi gadagan etmäge we nätanyş adamlaryň olar bilen habarlaşmak mümkinçiligini çäklendirmäge borçly ediler. Bu sazlamalar ulanyjy 17 ýaşyna ýetýänçä awtomatik usulda işlär.
Mundan başga-da, 16 ýaşdan 18 ýaş aralygyndaky ulanyjylar üçin gijeki wagtda sosial ulgamlaryny ulanmaga gadaganlyk girizilip bilner. Şeýle hem häkimiýetler 18 ýaşyna ýetmedik şahslaryň «romantiki» hat-habarlaşyklar üçin niýetlenen emeli aňly çat-botlara girmegini çäklendirmek isleýär.
Häzirki wagtda ýurduň hökümeti täze talaplary durmuşa geçirmegiň gurallarynyň üstünde işleýär.
