Jimmi «MrBeast» Donaldson YouTube platformasynda 500 million yzarlaýjy görkezijisine ýeten ilkinji bloger boldy. Ol bu pursaty platformada göni ýaýlymda görkezdi.
Donaldsonyň bu üstünligi YouTube-yň taryhynda täze rekord boldy. Mundan ozal hiç bir kanal, aýratyn hem blogerleriň arasynda bular ýaly görkezijä ýetip bilmändi. MrBeast sanlaryň yzyndan kowalaşmaýandygyny we ünsüni täze wideolara gönükdirmegi makul bilýändigini belledi. Şol bir wagtyň özünde, bloger goldawlary, kanalyna agza bolýandyklary we tomaşa edýändikleri üçin muşdaklaryna minnetdarlyk bildirdi.
MrBeast öz karýerasyna 2012-nji ýylda başlady, ýöne diňe 2017-nji ýylda «I Counted To 100 000!» wideosynyň çykmagy bilen meşhurlyk gazandy. Ol, esasan, göwün açyjy wideolary, çellenjleri we haýyr-sahawat çärelerini düşürýär. Donaldsonyň YouTube-da agzalarynyň sany boýunça iň ýakyn bäsdeşi seriallaryň, filmleriň we sazlaryň ýazgylaryny çykarýan T-Series hindi kanalydyr.
Yzarlaýjylarynyň sany boýunça YouTube-yň Top-10 kanaly:
- MrBeast — 500 mln (bloger);
- T-Series — 312 mln (filmler, aýdym-saz);
- Cocomelon — 210 mln (çagalar üçin wideolar);
- SET India — 189 mln (TW-şüweleň);
- Vlad and Niki — 150 mln (blogerler, çagalar kontenti);
- Stokes Twins — 140 mln (blogerler);
- Kids Diana Show — 138 mln (çagalar kontenti);
- KIMPRO — 133 mln (blogerler);
- Like Nastya — 132 mln (bloger, çagalar kontenti);
- Zee Music Company — 122 mln (aýdym-saz).
