YouTube ulanyjylary her aýda telewizorlarda dikligine düşürilen gysga Shorts wideolaryna 2 milliard sagatdan gowrak wagt tomaşa edýär. Aslynda, şeýle format ilkibaşda smartfonlar üçin döredilipdi.
Smart-telewizorlar YouTube-yň ösüşiniň esasy ugurlarynyň biri bolmagynda galýar. Diňe ABŞ-nyň özünde tomaşaçylar her gün telewizorlarda platformanyň kontentine 200 million sagatdan gowrak wagt sarp edýär. Kompaniýa Shorts wideolaryny has işjeň ilerledip başlady: gysga wideolar gözlegiň netijelerinde peýda bolýar, tiz wagtdan bolsa Google TV enjamlarynda «Siz üçin gysga wideolar» diýen aýratyn lenta dörediler.
Dik formatyň aýratynlyklary sebäpli telewizorlarda ekranyň gapdallarynda boş ýerler galýar. Şeýle aýratynlygy göz öňünde tutup, YouTube goşundynyň interfeýsini täzeledi we wideolaryň gapdalynda teswirleriň görkezilmegini goşdy.
Telewizorlarda tomaşa etmegiň meşhurlygynyň artmagy podkastlara hem täsir etdi. Striming platformalary olara wideony we audiony birleşdirýän format hökmünde garaýar. Ulanyjylar şeýle programmalary görüp ýa-da telewizorlary açyk goýup, ýönekeý diňläp bilýär.
2025-nji ýylda YouTube-yň auditoriýasy telewizorlarda her aýda 700 million sagatdan gowrak wagt podkasta tomaşa etdi. Bir ýyl öň bu görkeziji 400 million sagatdy. Netflix hem iri neşirýatlar bilen ylalaşyk baglaşyp hem-de aýratyn şoulara eksklýuziw hukuklary alyp, wideopodkastlara işjeň maýa goýup başlady.
