YouTube wideohostingi emeli aňyň kömegi bilen wideolaryň şahsy lentalaryny döretmegiň täze funksiýasyny işe girizdi. Indi saýlama wideolaryň ýygyndysyny döretmek üçin ulanyja diňe isleýän kontentiniň tekstli düşündirişini ýazmak ýeterlik diýip, «Android Authority» neşiri habar berýär.
Bu täze gural platformanyň baş sahypasynda ýerleşýän «Your custom feed» atly ýörite düwme arkaly elýeterlidir. Şol düwmä basylandan soň, ekranda islegi ýazmak üçin niýetlenen meýdança açylýar. Ulanyjy özüni gyzyklandyrýan temany özbaşdak düşündirip biler ýa-da ulgamyň hödürleýän taýýar görnüşleriniň birini saýlap biler. Döredilen şahsy lentany interfeýsiň iň ýokarky böleginde berkidip, zerur bolan ýagdaýynda täze wideo toplumyny döretmek üçin ony üýtgedip bolýar.
«Android Authority» neşiriniň bellemegine görä, bu täze funksiýa synag-eksperimental görnüşinde däl-de, eýsem doly derejeli resmi reliz hökmünde işe girizildi. Ilkinji tapgyrda ol kem-kemden diňe ABŞ-daky hasaba alnan ulanyjylar üçin mobil gurluşlarda we kompýuterlerde elýeterli bolar.
Bu guralyň işlemegi üçin akkaunt sazlamalarynda gözleg hem-de wideo tomaşalarynyň taryhy işjeňleşdirilen bolmaly. Häzirki wagtda bu interfeýs diňe iňlis dilini goldaýar.
Eger-de algoritm ýazylan islegi nädogry kabul etse, ulanyjy lentanyň ýanyndaky üç nokatly menýu arkaly işläp düzüjilere seslenme iberip biler. Munuň üçin funksiýanyň işindäki näsazlyklar barada habar bermäge mümkinçilik berýän «Something wrong?» diýen ýörite bölüm göz öňünde tutuldy.
