YouTube wideohostingi we Snap kompaniýasy Kentukki ştatynyň Breýsitt mekdep okrugynyň platformalary kämillik ýaşyna ýetmedikleriň ruhy saglygyna sosial ulgamlaryň ýaramaz täsirinde aýyplan kazyýet işi boýunça parahatçylykly ylalaşyk baglaşdylar.
2026-njy ýylyň 15-nji maýynda berlen kazyýet resminamalaryna görä, taraplar jedeli kadalaşdyrmak barada ylalaşdylar. Şertnamanyň şertleri aýan edilmeýär.
Arza beriji tarap platformalaryň algoritmleriniň ýetginjeklerde garaşlylygy emele getirýändigini, munuň bolsa okuwçylaryň psihologik ýagdaýynyň ýaramazlaşmagyna we mekdepleriň çagalara goldaw bermek üçin çykdajylaryny artdyrmaga mejbur edýändigini öňe sürdi.
Kazyýet işinde ýetginjekleriň arasynda biynjalyklygyň we ruhyçökgünligiň artýandygy barada hem aýdyldy. Mundan ozal ABŞ-nyň dürli ştatlaryndaky onlarça mekdep okruglary hem meňzeş şikaýatlary öňe sürüpdiler.
YouTube-yň wekilleri iş tamamlanandan soň, kämillik ýaşyna ýetmedik ulanyjylary goramaga hem-de onlaýn gurşawyň howpsuzlygyny ýokarlandyrmak üçin mugallymlar, mekdep administrasiýasy we ene-atalar bilen hyzmatdaşlyk etmäge taýýardyklaryny bildirdiler.
Töwekgelçilikleri azaltmak üçin platformalar ekranda bolunýan wagty gözegçilikde saklaýan gurallary, ene-atalaryň gözegçilik funksiýalaryny we mazmuny süzýän ulgamlary ulanýarlar. Şeýle hem kompaniýalar zyýanly bolmagy mümkin bolan mazmunyň ýaýramagyny çäklendirmek üçin maslahat beriş algoritmlerini sazlaýarlar.
Bilermenler ylalaşygyň geljekki kazyýet tejribesine täsir edip biljekdigini belleýärler. Häzirki wagtda ABŞ-da iri tehnologiýa kompaniýalaryna garşy sosial ulgamlaryň çagalara we ýetginjeklere edýän täsiri bilen baglanyşykly ýüzlerçe meňzeş kazyýet işleri garalýar.
