Saud Arabystanynyň «Al-Nasr» klubunyň hüjümçisi Kriştianu Ronaldu Braziliýanyň CazeTV platformasy bilen baglanyşykly bolan LiveModeTV halkara media taslamasynda paý satyn aldy. Bu şertnama futbolçynyň 2026-njy ýylyň dünýä çempionatynyň öňüsyrasynda sanly media gurşawyndaky biznes gyzyklanmalaryny giňeltmeginiň bir bölegi boldy.
Portugaliýaly futbolçynyň goýan maýasynyň möçberi we anyk paýy aýan edilmeýär.
«Biziň maksadymyz — sporty hemme kişi üçin elýeterli etmek we ony täze, ruhlandyryjy görnüşde hödürlemekdir. Biz YouTube-da ýaýlyma bermek arkaly hem-de kontentleri ähli sosial ulgamlarda ýaýratmak arkaly tomaşaçylaryň sanyny köpeltmek we olaryň gyzyklanmasyny has-da ýokarlandyrmak isleýäris» – diýip, Ronaldu «Bloomberg» neşirine beren teswirinde aýtdy.
LiveModeTV — Braziliýanyň CazeTV mediaplatformasynyň arkasynda duran LiveMode kompaniýasynyň halkara ugrudyr. CazeTV-ni dürli platformalarda jemi 26,2 million agzasy bolan strimer we bloger Kasimiro Migel döretdi. Soňky ýyllarda bu taslama Braziliýanyň media-bazarynyň iň belli oýunçylarynyň birine öwrüldi.
Halkara giňişliklere çykmak üçin ilkinji ädimleriň biri hökmünde bu kanal Portugaliýada işe girizildi. Taslama 2026-njy ýylyň dünýä çempionatynyň her oýun gününiň bir merkezi duşuşygyny YouTube-da mugt görkezmek hukugyna eýe boldy. Iýun we iýul aýlarynda geçiriljek ýaryşyň dowamynda jemi 34 oýny görkezmek meýilleşdirilýär.
CazeTV platformasy 2022-nji ýylda işe girizildi we 2022-nji ýylyň dünýä çempionaty, 2023-nji ýylyň aýallaryň arasyndaky dünýä çempionaty, şeýle hem täze formatda geçirilen Klublaýyn dünýä çempionaty ýaly iri futbol ýaryşlaryny ýaýlyma bermek arkaly belli boldy.
