Beýik aktýora iň köp meňzeşleriň ýygnanyşygy boýunça dünýä rekordyny täzelemek üçin 400-den gowrak kişi Çarli Çapliniň meşhur sergezdan keşbine girip, Şweýsariýada jemlendi.
Bu täsin çäre Ženewa kölünüň golaýyndaky Korsiýe-sýur-Wewede ýerleşýän «Chaplin's World» muzeýiniň çäginde geçirildi. Bu ýer aslynda rowaýaty kinorežissýoryň ömrüniň soňky ýyllaryny geçiren «Manuar de Ban» mülküniň hut özüdir.
Guramaçylar bu giň göwrümli çäräni muzeýiň açylmagynyň 10 ýyllyk ýubileýine bagyşlap gurnadylar. Täsin duşuşyga gatnaşyjylaryň hemmesi gara tegelek şlýapa geýip, emeli murt dakyndylar we ellerine hasa aldylar. Ýörite asmandan düşürilen wideo we fotosuratlar arkaly, ägirt uly mähelläniň Çapliniň öňki öýüniň meýdançasynda uly 10-luk sanynyň şeklini emele getirişi hasaba alyndy.
Çärede çykyş eden köp sanly gatnaşyjylar sessiz kino döwrüniň meşhur filmleriniň özlerinde ömürlik we ýagty täsir galdyrandygyny gürrüň berdiler. Bu baýramçylyk, dünýä kinematografiýasynyň öçmez ýyldyzynyň döredijiliginiň dürli nesilleriň we medeniýetleriň arasynda henizem ýaşap gelýändigini ýene-de bir gezek subut etdi.
«Chaplin's World» muzeýiniň aragatnaşyk bölüminiň ýolbaşçysy Oliwiýa Baligeniň sözlerine görä, Çapliniň kino älemini açmak we öwrenmek üçin bu ýere günde dünýäniň çar künjeginden müňlerçe syýahatçylar gelýär.
