Ýewropanyň Futbol Assosiasiýalarynyň Birleşigi (UEFA) Azerbaýjanyň «Turan-Towuz» klubuny 2026/27 möwsüminiň Konferensiýa ligasyna gatnaşmakdan çetleşdirdi. Bu çözgüt 2019-njy ýylda klubuň ýedi futbolçysynyň öňünden dilleşilen oýunlar baradaky iş boýunça diskwalifikasiýa edilmegi bilen baglanyşyklydyr.
«Azerisport» neşiriniň berýän maglumatyna görä, gürrüň Şahin Guluzade, Misir Rustamow, Sanan Goçaýew, Emin Bagirow, Rufat Mamedow, Ilkin Sadyhow we Eltaý Tagiýew barada barýar. 2019-njy ýylda UEFA bu oýunçylaryň duşuşyklaryň netijelerine täsir etmek amallaryna gatnaşandygy barada habar berdi we Azerbaýjanyň Futbol Federasiýalarynyň Assosiasiýasy (AFFA) bu ýagdaý tassyklanylandan soň, olary futbol bilen baglanyşykly islendik işden çetleşdirdi.
«Turan-Towuz» kluby bu çözgüdiň üstünden, şol sanda Sport arbitraž kazyýetine (CAS) şikaýat etjekdigini mälim etdi.
«Biz 2025/26 möwsümini ähli sport ýörelgelerini berjaý edip, üçünji ýerde tamamladyk we Konferensiýa ligasynda oýnamaga doly hukuk gazandyk» – diýlip, klubuň resmi beýanatynda aýdylýar.
Şol bir wagtyň özünde, klub täze möwsüme taýýarlyk işleriniň adaty tertipde dowam edýändigini, ýakyn wagtda bolsa toparyň Türkiýä okuw-türgenleşik ýygnanyşygyna ugrajakdygyny nygtady.
Ýatlap geçsek, toparyň baş tälimçisi meşhur türkmen hünärmeni Gurban Berdiýewdir. Ol topara 2024-nji ýylda ýolbaşçylyk edip başlapdy.
Azerbaýjanyň KHBS-niň ýazmagyna görä, ýewrokuboklara gatnaşmak gadagançylygy doly güýjüne giren ýagdaýynda, Konferensiýa ligasynda «Turan-Towuzyň» ornuny «Zirä» topary eýeläp biler.
