Hindistanyň Kolkota şäherinde (öňki Kalkutta) hünärmenler tarapyndan howply diýlip ykrar edilenden soň, Lionel Messiniň 21 metrlik heýkeli söküldi. Bu barada "Asian News International" agentligi "X" sosial ulgamynda habar berdi.
Aýna süýümi we demirden ýasalan altyn reňkli heýkel Argentinanyň milli ýygyndysynyň kapitanynyň Dünýä kubogyny galdyryp duran pursadyny görkezýärdi. Ýadygärlik dekabr aýynda argentinaly futbolçynyň Hindistana eden sapary wagtynda açylypdy.
Maý aýynyň ahyrynda Günbatar Bengaliýa ştatynyň kanun çykaryjy mejlisiniň deputaty Şaradwat Mukerji heýkeliň şemalyň täsiri astynda çaýkanýandygyny habar berdi. Onuň sözlerine görä, inženerler gurluşyň mundan beýläk ulanylmagynyň howply bolup biljekdigi baradaky netijä geldiler, şondan soň ony sökmek barada karar kabul edildi.
Lionel Messi geljekki dünýä çempionaty üçin Argentinanyň milli ýygyndysynyň düzümine girdi. Bu ýaryş onuň karýerasyndaky altynjy dünýä çempionaty bolar.
Messi – dünýä futbol taryhyndaky iň köp baýrakly futbolçydyr. 38 ýaşly argentinaly oýunçy «Inter Maýami» klubunda çykyş edýär. Ol sekiz gezek «Altyn top» baýragynyň eýesi, 2022-nji ýylyň dünýä çempiony, Çempionlar ligasynyň dört gezek ýeňijisi we Ispaniýanyň on gezek çempionydyr.
