Argentinaly futbolçy Lionel Messiniň baýlygy 1 milliard dollardan geçdi. «Inter Maýami» klubunyň hüjümçisi Kriştianu Ronaldudan ýedi aý soň «Bloomberg Billionaires Index» sanawyna girdi.
«Bloomberg» agentliginiň berýän maglumatyna görä, Messi 2007-nji ýyldan bäri dürli goşmaça bonuslary hem hasaba alanyňda, takmynan, 700 million dollar gazandy. Futbolçynyň umumy baýlygy maýa goýumlaryň, hemaýatkärlik şertnamalarynyň we onuň eýeçiligindäki aktiwleriň bahasynyň ýokarlanmagy netijesinde artdy.
Agentligiň bellemegine görä, karýerasynyň ilkinji ýyllarynda argentinaly ýyldyzyň mahabatdan gazanýan girdejileri onuň sportda gazanan üstünliklerinden pesdi. Ýöne bu ýagdaý soňky ýyllarda futbolçynyň kakasy Horhe Messiniň tagallasy we täsiri bilen düýpgöter üýtgedi.
Messi 2026-njy ýylda «Inter Maýami» bilen täze şertnama baglaşdy. Bu şertnama klubuň girdejisiniň bir bölegini paýnamalar görnüşinde almagy göz öňünde tutýar. Şertnama boýunça tölegleriň umumy mukdary ýylda 70–80 million dollara ýetip biler. Mundan başga-da, futbolçy «Apple TV» serwisi arkaly MLS oýunlarynyň görkezilişine ýazylýan janköýerleriň berýän pulundan hem paý alýar.
«Bloomberg» agentligi Kriştianu Ronalduny 2025-nji ýylyň oktýabr aýynda milliarderleriň sanawyna girizipdi. Portugaliýaly hüjümçi, agentligiň tassyklamagyna görä, dünýäde ilkinji milliarder futbolçy boldy.
