Argentinaly futbolçy Lionel Messi sport ulgamynda 2026-njy ýylyň halkara Asturiýa şa gyzy baýragynyň eýesi boldy. Bu barada Asturiýa şa gyzynyň gaznasy habar berdi.
Bu abraýly baýrak üçin dünýäniň 12 ýurdundan jemi 27 dalaşgär bardy. «Altyn topuň» sekiz gezek eýesiniň dalaşgärligini «Wetusta Uniwersidad de Owýedo Triatlon» klubunyň prezidenti Dawid Gonsales Alonso öňe sürdi.
Baýragyň gowşurylyş dabarasy şu ýylyň oktýabr aýynda bolar. Ýeňijä ispan hudožnigi Žoan Mironyň ýasan heýkeli, diplom, ýadygärlik nyşany we 50 müň ýewro möçberinde pul baýragy gowşurylar.
Messi Ispaniýanyň çempionatynyň, «Barselona» klubunyň we Argentinanyň milli ýygyndysynyň taryhyndaky iň gowy bombardirdir. Ol öz milli ýygyndysynyň düzüminde 2021-nji we 2024-nji ýyllarda Amerikanyň Kubogyny, 2022-nji ýylda «Finalissimany», şeýle hem 2022-nji ýyldaky dünýä çempionatyny utdy.
Futbolçy 2026-njy ýylyň 11-nji iýuny we 19-njy iýuly aralygynda ABŞ-da, Kanadada we Meksikada geçiriljek dünýä çempionaty üçin Argentinanyň milli ýygyndysynyň düzümine hem girizildi. Toparçalaýyn tapgyrda argentinalylar Alžiriň, Awstriýanyň we Iordaniýanyň ýygyndy toparlary bilen oýnar.
