Çagalaryň käbiri entek mekdebi tamamlamanka dünýä rekordçysyna öwrülmegi başarýarlar. Olaryň sungatda, ylymda, žurnalistikada, moda ugurlarynda gazanan üstünlikleri eýýäm ömürleriniň ilkinji ýyllarynda Ginnesiň rekordlar kitabynda öz orunlaryny tapmaklaryna mümkinçilik berýär.
Iň ýaş suratkeş
Ispaniýaly Jon Kristian Kaldeýra Weýbull erkekleriň arasynda dünýäniň iň ýaş suratkeşi diýlip ýkrar edildi. Rekord hasaba alnan pursadynda ol bary-ýogy on aý, ýedi günlük çagady. Onuň surat çekmäge bolan höwesi entek bäş aýlyk wagty, ata-enesi tarapyndan surat çekmek üçin niýetlenen swetodiodly planşet sowgat berleninden soň oýandy. Soňra oglanjyk reňkler bilen işläp başlady. 2024-nji ýylyň güýzünde onuň abstrakt žanrdaky suratlary Marbelýadaky çeperçilik sergisinde görkezildi we olaryň köpüsi gyzgalaňly satyldy.
Iň ýaş dizaýner
Amerikaly Maks Aleksander Pariždäki moda hepdeliginde doly göwrümli moda görkezilişini guran iň ýaş guramaçy we iň ýaş modelýer hökmünde iki sany dünýä rekordyny goýdy. Ol lybas döretmäge dört ýaşynda başlady. Ýedi ýaşynda bolsa onuň toplumy Denwerdäki moda hepdeliginde görkezildi. 2026-njy ýylda dizaýner Pariždäki Garnýe köşgünde daşky gurşawa zyýansyz bolan ekologik ýygyndysyny tanyşdyrdy. Onuň taýýarlan lybaslaryny Şeron Stoun we Debra Messing ýaly golliwud ýyldyzlary geýdiler.
Iň ýaş žurnalist
Beýik Britaniýanyň ýaşaýjysy Anişwar Kunçala dünýäniň iň ýaş gazet synçysy diýen ady aldy. Ol özüniň ilkinji awtorlyk makalasyny sekiz ýaş, 76 günlükkä ýazdy. Kiçijik žurnalist öz makalalarynda ýitip gitmek howpundaky haýwanlar barada gürrüň berip, tebigaty goramak we howanyň üýtgemegi hakda özüçe mesele gozgaýar.
Iň ýaş DJ
Ýaponiýaly Rinoka zenanlaryň arasynda dünýäniň iň ýaş klub DJ-ýi boldy. Ol alty ýaş, 155 günlükkä Tokionyň Meguro etrabyndaky klublaryň birinde çykyş etdi. 70 minutlyk çykyşynyň dowamynda gyzjagaz degişli enjamlar bilen işledi we 100 adamlyk tomaşaçynyň öňünde çykyş etdi. Ol sazyň daşyndan hip-hop bilen meşgullanýar, skeýtbord sürýär we mekdepde okaýar.
Iň ýaş uniwersitet uçurymy
Amerikaly Maýkl Kirni Ginnesiň taryhyna iň ýaş uniwersitet uçurymy hökmünde girdi. Ol 1994-nji ýylyň iýunynda, ýaňy bir on ýaş, dört aýlykka Günorta Alabama uniwersitetinde antropologiýa boýunça bakalawr derejesini aldy. Dört ýyldan soň Maýkl Midl-Tennessi ştatynyň uniwersitetinde himiýa ugry boýunça magistraturany tamamlady. Ol bu ylmy derejäni alanda bary-ýogy 14 ýaş, sekiz aýlykdy.
