Kazyýet subutnamalary üçin sesleri seljermäge ýöriteleşen Ýaponiýanyň «Tiba audiokommunikasiýalar barlaghanasy» täjirçilik däl guramasy bäbekleri uklatmak üçin niýetlenen sazy döretdi. Bu saz ýazgysy X sosial torunda (öňki Twitter) iki hepdede 3,8 milliondan gowrak gezek diňlenildi.
Bu taslama çagalaryň yzygiderli aglamagy sebäpli stressi başdan geçirýän ene-atalary goldamak baradaky başlangyjyň bir bölegi hökmünde amala aşyryldy. Bu pikir barlaghananyň işgärleriniň öz iş tejribesinde emosional ýadawlyk we dogrumdan soňky depressiýa sebäpli çagalara ýowuz daraşylýan ýagdaýlar bilen ýüzbe-ýüz bolanlaryndan soň döredi.
Dowamlylygy 14 minut töweregi bolan bu kompozisiýa saz gutujygynyň owazyny hem-de deňiz tolkunlarynyň sesini we adamyň ukuda wagtyndaky dem alşyny ýatladýan «gülgüne sesi» utgaşdyrýar.
Saz ýazgysy neşir edilenden soň, guramanyň internet saýtyna 350 müňe golaý adam girip gördi.
Barlaghananyň ýolbaşçysy Musutoşi Muraoka bu saz döredilende uky boýunça we dürli sesleriň adam bedenine ýetirýän täsirleri baradaky ylmy barlaglaryň netijelerinden peýdalanylandygyny habar berdi.
«Men, iň bolmanda, 30 minut dynç almaga mätäç bolan ene-atalara we çagalar baglarynyň terbiýeçilerine kömek etmek isleýärin» – diýip, Muraoka aýtdy. Şol bir wagtda ol bu sazyň her bir bäbege deň derejede täsir etmejekdigini hem nygtady.
Hünärmen sazyň ölçeglerini — depginini we ses belentliginiň çäklerini kesgitläp, soňra sazy ýazmagy barlaghananyň işgäri Sinsuke Sibutaniýa tabşyrdy. Ol bolsa bu işi üç günüň içinde tamamlady.
Bu sazy barlaghananyň saýtyndan iýun aýynyň ahyryna çenli mugt ýükläp almak bolýar.
