Tailandyň patyşasy Rama X-nyň uly gyzy, halk arasynda şa gyzy Pa hökmünde tanalýan şa gyzy Bajrakitiýabha Narendira Debýawati 47 ýaşynda aradan çykdy. Bu barada patyşalyk köşgüniň metbugat gullugy habar berdi.
2022-nji ýylyň dekabr aýynda şa gyzy ýurduň milli seýilgähleriniň birine gezelenç wagty huşuny ýitirdi. Ony dikuçar arkaly Bangkok şäheriniň hassahanasyna eltdiler we ol ömrüniň ahyryna çenli şol ýerde huşuna gelmän ýatdy.
Şa gyzy 1978-nji ýylyň 7-nji dekabrynda dünýä indi. Ol ABŞ-nyň Kornell uniwersitetinde ýokary bilim alandan soň, hukuk ylymlarynyň magistri we doktory derejelerini aldy we Tailandyň Baş prokuraturasynyň edarasynda prokuror bolup işledi. Şeýle hem ol 2012–2014-nji ýyllar aralygynda Awstriýadaky, Sloweniýadaky we Slowakiýadaky ilçi wezipelerini eýeledi.
BMG-niň Jenaýatçylygyň öňüni almak we jenaýat adalatlylygy boýunça komissiýasy 2017-nji ýylda ony Günorta-Gündogar Aziýada kanunyň hökmürowanlygy meseleleri boýunça hoşniýetli ilçi edip belledi. Mundan başga-da, ol tussaglykda oturan aýal-gyzlaryň hukuklaryny goramak ugrunda işjeň zähmet çekdi.
Şa gyzy Pa 2021-nji ýylda general adyny alyp, Patyşalyk howpsuzlyk serkerdeliginde wezipä bellenildi.
«Reuters» habarlar agentliginiň maglumatlaryna görä, şa gyzynyň aradan çykmagy sebäpli ýurtda milli matam yglan ediler.
Şa gyzy Pa patyşa Rama X-nyň tagta geçmäge hukugy bolan üç sany perzendiniň biridi. Häzirki wagtda patyşalyk tagtynyň mirasdüşeri Rama X-nyň üçünji nikasyndan bolan ogly — şazada Dipangkorn Rasmiçotidir.
