Tailandda 93 ýaşynda şa ene Sirikit aradan çykdy diýip, Associated Press agentligi habar berýär. Patyşa maşgalasynyň metbugat gullugynyň maglumatlaryna görä, ol Bangkokyň hassahanalarynyň birinde ýogaldy.
17-nji oktýabrda Sirikitde sepsis – ganyň zäherlenmegi ýüze çykdy, lukmanlar ähli tagallalara garamazdan, oňa garşy durup bilmedi.
Sirikit birnäçe günbatar ýurtlarda, şol sanda Fransiýada we Beýik Britaniýada Tailandyň ilçisi bolan diplomatyň gyzydy. 1950-nji ýylyň aprelinde ol tiz wagtdan tagta çykyp, Rama IX adyny alan Pumipon Adunýadete durmuşa çykdy. Ol ýurdy 70 ýyldan gowrak dolandyrdy – bu hem Tailandyň taryhynda iň uzak hökümdarlyk we dünýäde iň uzak hökümdarlygyň biri boldy. 2016-njy ýylda Rama IX aradan çykandan soň, tagty onuň ogly, häzirki patyşa Maha Waçiralongkorn eýeledi. Ol Rama X adyny aldy.
2021-nji ýylda insult geçirmezden ozal, Sirikit haýyr-sahawat we ýabany tebigaty goramak taslamalary bilen işjeň meşgullanypdy. Şa aýaly taý halkynyň arasynda uly hormatdan peýdalanýardy, onuň portretleri bolsa öýlerde we dürli edaralarda asylýardy. Sirikidiň doglan güni, 12-nji awgust ýurtda Ene güni hökmünde bellenýärdi.
Häzirki patyşadan başga-da, Sirikidiň Rama IX bilen nikadan ýene üç gyzy boldy. Tailandda ene şanyň ölümi sebäpli milli matam yglan edildi: döwlet edaralar 30 gün baýdaklary aşak düşürer, döwlet gullukçylary we şa maşgalasy bolsa bir ýyllap matam tutar.
