FIFA 2026-njy ýyldaky futbol boýunça dünýä çempionatynyň resmi saz albomyny tanyşdyrdy. Ýygynda dürli ýurtlardan bolan ýerine ýetirijiler tarapyndan ýazylan 18 sany kompozisiýa girdi.
Albom LiSA, Anitta we Rema tarapyndan ýerine ýetirilen «Goals», Future we Tyla-nyň «Game Time», şeýle hem Jessi Reýes we Elyananyň «Illuminate» aýdymlary bilen açylýar.
Treklere «The Rolling Stones» toparynyň «In the Stars» aýdymynyň remiksi, Stormzy, Fridayy we Angeliň «Blessings» kompozisiýasy, şeýle hem Şakiranyň Burna Boy bilen bilelikde ýazan «Dai» aýdymy hem goşuldy.
FIFA-nyň prezidenti Janni Infantinonyň aýtmagyna görä, albom ýakynlaşyp gelýän ýaryşyň möçberini we medeni dürlüligini şöhlelendirip, dürli nesilleriň, žanrlaryň we ýurtlaryň sazandalaryny birleşdirýär.
Ýygyndydaky kompozisiýalar Meksikada, Kanadada we ABŞ-da ýaryşdan öňki çäreleriň dowamynda, şeýle hem dünýä çempionatynyň açylyş dabarasynda ýaňlanar.
2026-njy ýyldaky futbol boýunça dünýä çempionaty ABŞ-da, Kanadada we Meksikada geçiriler. Ýaryş 11-nji iýunda başlanar, açylyş oýny bolsa Meksikanyň paýtagtyndaky «Asteka» stadionynda bolar.
