Islandiýa bahalaryň umumy derejesi boýunça Şweýsariýadan öňe geçip, ýene-de dünýäniň iň gymmat ýurdy boldy. Bu barada «Bloomberg» agentligi Viska intellektual zähmet işgärleriniň kärdeşler arkalaşygynyň «Ýewrostat» we ýurduň Merkezi bankynyň maglumatlaryna esaslanýan hasaplamalaryna salgylanyp habar berýär.
Viska guramasynyň ykdysatçysy Wilhýalmur Hilmarssonyň berýän bahasyna görä, häzirki wagtda Islandiýadaky bahalaryň derejesi Şweýsariýadakydan, takmynan, üç göterim punkt ýokarydyr. Islandiýa bu reýtingde soňky gezek 2018-nji ýylda birinji orny eýeläpdi.
Hünärmenler bahalaryň ýokarlanmagyny pandemiýadan soň güýçlenen we ýurduň ykdysadyýetiniň dikelmeginde esasy şertleriň birine öwrülen syýahatçylyk işjeňligi bilen baglanyşdyrýar. Hilmarssonyň aýtmagyna görä, syýahatçylyk pudagynyň çalt ösmegi hyzmatlaryň gymmatlamagyna, zähmet haklarynyň ýokarlanmagyna we ýaşaýyş jaý bazaryna täsir edýär. Şeýle hem, gysga möhletli kärende jaýlary ugrunda ýerli ýaşaýjylar bilen syýahatçylaryň arasynda emele gelýän bäsdeşlik bazardaky kynçylyklary has-da artdyrýar.
Neşir edilen maglumatlara görä, Islandiýada azyk önümleri Demirgazyk Ýewropanyň beýleki ýurtlaryndakydan 44% gymmatdyr. Süýt önümleriniň we ýumurtganyň bahasy ortaça derejeden 75%, etiň bahasy bolsa 71% ýokary. Içgileriň bahasy hem ýokarylygyna galýar: mysal üçin, bir çaşka kofe 1 müň krona (6,98 ýewro) çenli ýetip bilýär.
Bahalaryň yzygiderli ýokarlanmagynyň netijesinde, syýahatçylyk guramalary bu ýurda gelmek isleýänleriň sanynyň kem-kemden azalyp başlaýandygynyň ilkinji alamatlaryny görüp başlady. Ykdysatçylar bolsa ýurduň ykdysadyýetiniň köp zähmeti talap edýän pudaklara, aýratyn-da, syýahatçylyga garaşly bolmagynyň inflýasiýa basyşyny geljekde hem saklap biljekdigini duýdurýar.
