Şanhaýda deňiz dynç alşynyň täsin görnüşi — «hiç ýere gitmeýän syýahatlar» ýola goýuldy. «Xinhua Net» agentliginiň habar bermegine görä, bu saparlarda gämi hiç bir porta girmän, üç günden soň ýene ýola çykan nokadyna gaýdyp gelýär.
Ilkinji gatnawlar üç gün we iki gije — şenbe gününden duşenbe gününiň irki wagtlaryna çenli niýetlenendir. Esasy üns bortdaky dynç alşa we oýun-güýmenjelere gönükdirilendir. Ýolagçylar üçin stendap-komikleriň çykyşlary, illýuziýa şüweleňleri, temalaýyn agşamlar we giçki naharlar taýýarlanyldy.
Syýahatçylaryň rahatlygy üçin gäminiň ýüklenişi maksimum sygymlylygynyň 80%-i bilen çäklendirilendir. Guraýjylaryň maglumatlaryna görä, gatnaşyjylaryň ortaça ýaşy 47-ä deň bolup, bu adaty kruizlerdäkiden (55 ýaş) has pesdir.
Syýahatçylaryň biri bu formatyň goşmaça rugsat günlerini almazdan dynç almaga mümkinçilik berýändigini belledi.
Şanhaý şäheriniň ulag komissiýasynyň wekili Tun Danýin täze formatyň adaty kruizleriň ýönekeýleşdirilen görnüşi däldigini aýtdy. Bu hyzmatlaryň sarp ediliş modeli bilen tapawutlanýan düýbünden täze, garaşsyz syýahatçylyk önümidir.
Hytaýda deňiz syýahatlaryna bolan gyzyklanma artmagyny dowam etdirýär. 2025-nji ýylda ýurduň kruiz liniýalarynyň ýolagçy akymy öňki ýyl bilen deňeşdirilende 25,3% artdy.
