Fransuz suratkeşi JR Pariziň iň köne köprüsini uly göwrümli çeperçilik giňişligine öwüren «Pon-Nýof gowagy» atly gurnamasyny köpçülik üçin açdy. Bu desgany görmek mugtdyr we ol 28-nji iýuna çenli dowam eder.
Taslama uzynlygy 120 m, ini 20 m we beýikligi 18 m çenli bolan gurluşdan ybaratdyr. Ol daşyndan gowagyň görnüşini döredýär hem-de wizual, ses, ys we sanly elementleri özünde birleşdirýär.
Açylyş dabarasy zabun howa şertleri sebäpli ýüze çykan birnäçe günlük abatlaýyş işlerinden soň amala aşyryldy. Gurnama işleri wagtynda desganyň gurluşy ýagyn, ýel we doly sebäpli zeper görüpdi. Gurnama üçin ses dizaýnyny «Daft Punk» duetiniň agzasy Tomas Bangalter döretdi. Taslamanyň ys bölegini bolsa ys boýunça hünärmen Sara Buasse taýýarlady.
Gowagy synlamaga gelenler üçin giňeldilen hakykat elementleri hem hödürleniler.
Guramaçylaryň sözlerine görä, taslama hususy serişdeler we hyzmatdaşlaryň goldawy esasynda maliýeleşdirildi. Gurnamanyň işi tamamlanandan soň, onuň materiallaryny saklap galmak, täzeden ulanmak ýa-da gaýtadan işlemek meselelerine serediler.
