Türkmenistanyň «El Darak» haly kärhanasy Türkmen halysynyň milli muzeýi bilen hyzmatdaşlykda beýik rus şahyry Aleksandr Sergeýewiç Puşkiniň ertekileriniň esasynda özboluşly el halyny dokady. Bu taslama Türkmenistan bilen Russiýanyň arasyndaky dostlugyň, medeni diplomatiýanyň hem-de rus medeniýetine goýulýan çuňňur hormatyň nyşany hökmünde amala aşyryldy.
Ölçegi 2 x 1,5 metr bolan täze halyda ussat halyçylar Lukomorýäni, Altyn horazy, «Patyşa Soltan hakyndaky ertekiniň» gahrymanlaryny we beýik şahyryň eserlerinden beýleki belli keşpleri şekillendirdi. «El Darak» kompaniýasynyň esaslandyryjysy Ogulgerek Durdyýewanyň bellemegine görä, bu eser rus edebi däpleri bilen türkmen halyçylyk sungatynyň köp asyrlyk mirasyny birleşdirip, medeni dialog üçin giň mümkinçilik döredýär.
Elde dokalýan halylary öndürmek bilen meşgullanýan «El Darak» kompaniýasy Türkmen halysynyň milli muzeýi bilen bilelikde gadymy haly dokamak tehnologiýalaryny dikeltmek ugrunda yzygiderli iş alyp barýar.
Türkmen halysynyň baýramy 1992-nji ýyldan bäri döwlet derejesinde bellenilip gelinýär. Aşgabatda iki müň töweregi seýrek eksponaty özünde jemleýän Türkmen halysynyň milli muzeýi hereket edýär we bu ýerde Türkmen halyşynaslarynyň bütindünýä jemgyýetiniň ştab-kwartirasy ýerleşýär.
2019-njy ýylyň dekabrynda türkmen halyçylyk sungaty ÝUNESKO-nyň Adamzadyň maddy däl medeni mirasynyň sanawyna girizildi.
