Daşary gurşawy goramak ministriniň orunbasarynyň ýolbaşçylygyndaky Türkmenistanyň wekiliýeti Howanyň üýtgemegi boýunça BMG-niň Çarçuwaly konwensiýasynyň kömekçi düzümleriniň 64-nji mejlisine (UNFCCC SB64) gatnaşýar. Bu forum Germaniýanyň Bonn şäherinde 2026-njy ýylyň 8—18-nji iýuny aralygynda geçirilýär.
Türkmenistanyň wekilleri forumda klimat meseleleri boýunça ýurduň garaýyşlaryny tanyşdyrdy we Pariž ylalaşygynyň hem-de BMG-niň Çarçuwaly konwensiýasynyň çägindäki borçlaryň ýerine ýetirilişi barada hasabat berdi. Ýyladyşhana gazlarynyň zyňyndylaryny azaltmaga, gaýtadan dikeldilýän energiýa çeşmelerini ösdürmäge, energiýa netijeliligini ýokarlandyrmaga we arassa tehnologiýalary ornaşdyrmaga gönükdirilen maksatlar aýratyn nygtaldy.
Gepleşikleriň dowamynda Aşgabatda Merkezi Aziýa üçin howa tehnologiýalarynyň Sebit merkezini döretmäge görülýän taýýarlyk işlerine aýratyn üns çekildi. Türkmen wekiliýeti bu taslama boýunça sebitiň ýurtlary we BMG-niň düzüm birlikleri bilen hyzmatdaşlyk etmäge taýýardygyny mälim etdi.
Mejlisiň çäklerinde Konwensiýa gatnaşýan döwletleriň, şeýle hem halkara we sebit guramalarynyň wekilleri bilen ikitaraplaýyn duşuşyklar geçirildi. Taraplar Durnukly ösüş maksatlaryna ýetmek üçin bilelikdäki taslamalary, howa tehnologiýalarynyň ornaşdyrylmagyny we sebit hyzmatdaşlygynyň berkidilmegini maslahatlaşdy.
