Balkan welaýatynda Medeniýet hepdeligini geçirmäge taýýarlyk görülýär. Bu medeni çäräni Medeniýet we sungat işgärleriniň hem-de Magtymguly Pyragynyň şygryýet güni mynasybetli 22 — 27-nji iýun aralygynda geçirmek meýilleşdirilýär.
Hepdeligiň çäklerinde Balkanabat şäherindäki «Türkmeniň ak öýi» binasynda çäräniň açylyş we ýapylyş dabaralary, aýdym-sazly çykyşlar, ylmy maslahatlar, sergiler, döredijilik duşuşyklary hem-de edebi agşamlar guralar.
Şeýle-de, filmleriň we sahna oýunlarynyň görkezilişi bolar, ozal yglan edilen döredijilik bäsleşikleriniň jemleri jemlener we Magtymguly adyndaky milli sazly drama teatrynda «Leýli-Mejnun» operasynyň görkezilişi geçer.
Medeniýet hepdeligi ýurtda milli medeniýeti we mirasy ösdürmegiň, ony halkara derejede giňden wagyz etmegiň çäklerinde geçirilýär.
