Türkmenistanyň we Hytaýyň alymlary Garagum çölünde bilelikdäki ylmy-gözleg ekspedisiýasyny geçirdi.
Bu taslama Türkmenistanyň Daşky gurşawy goramak ministrliginiň Çöller, ösümlik we haýwanat dünýäsi milli institutynyň hem-de Hytaý Halk Respublikasynyň Ylymlar akademiýasynyň Sinszýan ekologiýa we geografiýa institutynyň arasyndaky ylalaşygyň çäginde guraldy.
Ekspedisiýanyň dowamynda toplanan ylmy materiallar Türkmenistanyň Gyzyl kitabynyň täze neşirini hem-de çöl ösümlikleriniň atlasyny taýýarlamak üçin ulanylar. Hytaýly hünärmenler bolsa Garagum we Takla-Makan çöllerini biri-biri bilen deňeşdirip öwrenmek üçin zerur bolan ylmy maglumatlary ýygnady.
Ekspedisiýanyň ylmy ugry Merkezi Garagumdaky «Garryköl» meýdançasyny, Bokurdak we Ýerbent sebitlerini, Derweze gaz kraterini, Gaplaňgyr döwlet tebigy goraghanasyny hem-de «Bereketli Garagum» döwlet tebigy goraghanasyny öz içine aldy. Gözlegçiler çölüň ösümlik dünýäsini, süýrenijilerini we guşlaryny öwrendi, şeýle hem geobotaniki synlary geçirip, toprak nusgalaryny aldy.
Ylmy saparyň jemleýji tapgyry Repetek goraghanasy boldy. Gatnaşyjylar goraghananyň muzeý we ylmy gaznalary bilen ýakyndan tanyşdy, şondan soň bolsa gözleg maksatnamasyny tamamlap, Aşgabada dolandy.
