Ortaýer deňzinden taşlanyp gidilen we ýitirilen balyk torlaryny çykarmak boýunça geçirilen operasiýa gatnaşan suwasty ýüzüjiler ilkinji gezek uly ýaşly ak akulanyň öz tebigy gurşawynda suwasty kadrlaryny almagy başardy. Bu barada Healthy Seas Foundation guramasy habar berdi.
Gaznanyň berýän maglumatlaryna görä, daýwerler uly ýaşly ak akulany gönüden-göni suwuň aşagynda surata düşürip bildi. Missiýanyň gatnaşyjylary bu duşuşygy Ortaýer deňzindäki ýyrtyjylaryň populýasiýasyny öwrenmek üçin örän seýrek we möhüm waka diýip atlandyrdy.
Neapolyň Zoologiýa institutynyň doktory Karlo Kattano Ortaýer deňzi sebitindäki ak akulalar baradaky maglumatlaryň köpüsini alymlaryň diňe ölen haýwanlaryň üsti bilen öwrenendiklerini belledi. Tebigy gurşawda diri we uly ýaşly akulalary synlamak bolsa häzie çenli ýeke-täk we örän seýrek duş gelýän ýagdaý bolmagynda galýar.
Bu çärä ýitirilen balykçylyk torlaryny gözlemek we olary deňizden aýyrmak işleri bilen meşgullanýan Ghost Diving halkara guramasy hem işjeň gatnaşdy. Guramanyň wekili Derk Remmers suwuň astynda ak akula bilen gabat gelmek ähtimallygynyň örän pesdigini we munuň uly lotereýa baýragyny utmak mümkinçiligi bilen deňdigini belledi.
Häzirki wagtda ýitip ýa-da zyňlyp deňizde galýan «arwah torlar» deňiz ekoulgamlary we daşky gurşaw üçin iň uly ekologik meseleleriň biri hasaplanýar. Deňizde galan bu enjamlar ýyllaryň dowamynda deňiz jandarlaryna we korall riflerine zyýan ýetirmegini dowam edýär.
