Awstraliýanyň Täze Günorta Uels ştatynda howpsuzlyk gullugynyň işgärleri umumy bahasy takmynan 200 müň dollar bolan 100 müňden gowrak janly ekzotik saçakçyny ele saldylar. Bu barada The Guardian gazeti habar berýär.
Bu mör-möjekleri konfiskasiýa etmek çäreleri öý haýwanlarynyň bikanun söwdasyna garşy geçirilen giň gerimli operasiýanyň barşynda amala aşyryldy. Mör-möjekler söwda maksatly köpeltmek bilen meşgullanýan bir şahsyň ýanyndan tapyldy.
Alnan jandarlaryň arasynda «Dubia» görnüşli saçakçylar, şeýle-de dünýäde öz görnüşleriniň iň irileriniň biri hasaplanýan Madagaskaryň jyzyrdawuk saçakçylary bar. Neşiriň maglumatyna görä, bu mör-möjekler satmak, şol sanda süýrenijiler üçin iým hökmünde ulanmak maksady bilen ýygnalypdyr diýlip çaklanylýar.
Geçirilen bu operasiýa Awstraliýanyň taryhynda bikanun ekzotik oňurgasyz jandarlaryň ele salnan iň uly ýagdaýy boldy. Ýurda ekzotik saçakçylary getirmek kanunçylyk tarapyndan gadagan edilendir, şonuň üçin olary saklamak, köpeltmek we satmak hem bolmaýar.
Awstraliýanyň häkimiýet edaralary munuň ýaly jandarlaryň peýda bolmagynyň ýerli ekoulgama howp salyp biljekdigini belleýärler. Çünki şeýle saçakçylar aýdylyşy ýaly, keselleriň ýaýramagyna sebäp bolup, ýerli haýwanat dünýäsine we oba hojalygyna uly zyýan ýetirip bilerler.
