Tomusda, uzak wagtlap yssyda bolnandan soň, awtoulagyň salonynyň birden sowadylmagy sürüjiniň we ýolagçylaryň saglygyna ýaramaz täsir edip biler. Hünärmenler gyzgyn awtoulaga girenden soň, kondisioneri derrew iň pes temperatura goýmazlygy maslahat berýärler.
Lukmanlaryň sözlerine görä, esasy faktor salonda iň pes temperaturanyň bolmagy däl-de, daşarky we içerki temperaturalaryň arasyndaky tapawutdyr. Takmynan alty gradus tapawut iň amatlysy hasaplanýar. Howanyň temperaturasy 30 gradus töweregi bolanda kondisioneri 24 gradus töweregine sazlamak maslahat berilýär.
Temperaturanyň birden üýtgemegi diňe bir burnuň akmagyna, bokurdagyň agyrmagyna ýa-da sesiň gyrylmasyna däl, eýsem umumy ýarawsyzlyga hem sebäp bolup biler. Kondisioneriň üfleýän gurak howasy goşmaça faktordyr. Uzak ýola gidilende bu nemli bardalaryň we gözüň gyjynmagyna sebäp bolup biler.
Şeýle hem hünärmenler kondisioner ulgamyna yzygiderli tehniki hyzmaty edip durmagyň zerurdygyny nygtaýarlar. Hapa howa geçirijilerinde, bugardyryjyda we salonyň köne süzgüjinde bakteriýalar, kömelekler we heň köpelip bilýär.
Kondisioneri howpsuz ulanmak üçin, ilki bilen, aýnalary birnäçe minutlap açyp goýmak arkaly ulagyň içini ýelejiretmek, soňra temperaturany ýuwaş-ýuwaşdan peseltmek maslahat berilýär. Salonyň howasyny gyradeň sowatmak üçin sowuk howany adama däl-de, ýokary ýa-da penjirä tarap gönükdirmek maslahat berilýär.
