MMA-nyň russiýaly söweşijisi Fýodor Ýemelýanenko 2026-njy ýylda Kro Kop lakamy bilen tanalýan horwatiýaly Mirko Filipowiç bilen söweşjekdigini habar berdi. Söweş boks düzgünleri boýunça geçiriler diýip, ol “Gazeta.Ru” bilen söhbetdeşlikde aýtdy.
“Men MMA-da çykyşymy tamamladym, sebäbi men eýýäm 49 ýaşymda we fiziki taýdan biraz pes. Ýöne boksda hemme zat birneme aňsat. Häzir biz görkeziliş däl-de, hakyky söweş barada maslahatlaşýarys” – diýip, Ýemelýanenko aýtdy.
Söweşi martda ýa-da aprelde Serbiýada geçirmek meýilleşdirilýär.
Ýemelýanenko söweşiň geçiriljek ýeri, senesi we ýaryşyň maliýe tarapy barada doly pikirleriň bardygyny, diňe şertnamanyň punktlaryny ylalaşmagyň galandygyny belledi.
Russiýaly söweşijä taýýarlanmaga boks boýunça öňki dünýä çempiony Denis Lebedew kömek eder.
Söweş 2005-nji ýyldaky duşuşygyň rewanşy bolar. Şol wagt Fýodor Filipowiçi ýeňip, Pride çempiony titulyny gorapdy.
Ýemelýanenko MMA-daky çykyşyny 2023-nji ýylyň 5-nji fewralynda Raýan Beýderden ýeňlenden soň tamamlady. Ol karýerasynyň dowamynda 48 söweşe gatnaşyp, 40-ysynda ýeňiş gazandy, ýedi gezek ýeňildi, bir söweş geçirilmedik diýlip hasaplandy. Söweşiji ringde Maýk Taýson bilen hem duşuşmak isländigini, ýöne onuň bilen ylalaşyp bilmändigini aýtdy.
