Ukrainaly boksçy Aleksandr Usik kikboksçy Riko Werhoweni 11-nji raundda tehniki nokaut bilen ýeňdi we agyr agramdaky WBA, WBC we IBF çempionlyk titullaryny gorap galdy.
Tutluşyk 24-nji maýa geçilýän gije Müsüriň Giza şäherinde geçdi.
11-nji raundda Usik garşydaşyny nokdauna iberdi. Werhowen aýaga galmagy we söweşi dowam etdirmegi başardy, emma ukrainaly boksçy derhal onuň üstüne hüjüm etdi we netijede referi tutluşygy saklady.
Bu söweş Usigiň karýerasynda başga bir başa-baş söweş sungatynyň wekili bilen geçiren ilkinji duşuşygy boldy. 39 ýaşly ukrainaly boksçy üçin bu ýeňiş professional ringdäki 25-nji tutluşykda 25-nji ýeňişdir. Ol bu bäsleşikleriň 16-syny möhletinden öň tamamlady.
37 ýaşly Werhowen bolsa professional boksda ikinji söweşini geçirdi. Ol 2014-nji ýylyň aprelinde niderlandly boksçy wenger Ýanoş Finferany ikinji raundda nokaut edenden soň, karýerasyny kikboksingde dowam etdirdi.
Werhowen öz nesliniň iň görnükli kikboksçylarynyň biri hasaplanylýar. Ol bu sport görnüşindäki karýerasy boýunça 76 söweş geçirip, olaryň 66-synda ýeňiş gazandy.
