Hytaýyň Syçuan welaýatynda ýerleşýän Hunsi köprüsiniň ýol örtügi we birnäçe aralygy ýykyldy. Bu köpri welaýat sebitini Tibet platosy bilen baglanyşdyrýardy. Köpriniň gurluşygy 2025-nji ýylyň başynda tamamlanypdy. Reuters we China Daily neşirleriniň ýazmagyna görä, hadysa gurluşykdaky säwlikler zerarly däl-de, eýsem tebigy sebäplerden ýüze çykypdyr.
Geçen duşenbe güni köpriniň ýerleşýän ýerinde dag eteginiň deformasiýasy we gaýada ýaryklar ýüze çykarylypdyr. Ýerli häkimiýetler mümkin bolan howpy seljerenden soň, halas ediş gulluklaryny çagyrdylar. Ýol tiz wagtda ýapyldy, üstündäki awtoulaglar bolsa ewakuasiýa edildi.
Ertesi gün dag etegindäki ýer süýşmesi köpriniň diregleriniň ýykylmagyna sebäp boldy. Netijede, köpriniň birnäçe aralygy we dagyň gyrasynda ýerleşýän ýol bölegi dolulygyna ýumruldy. Şol bir wagtyň özünde alnyp barlan çäreleriň netijesinde adam pidasy ýa-da ýaralanan bolmady.
Häzirki wagtda sürüjiler aýlawly ýollary ulanmaga mejbur bolýarlar. Welaýat ýolbaşçylary ýoluň dikeldiljek wagtyny entek takyk aýdyp bilenoklar, ýer süýşmesiniň netijeleri heniz öwrenilýär.
