Hytaýyň günorta we merkezi sebitlerinde ýagan güýçli ýagyşlar sil suwlaryna we ýer süýşgünlerine getirdi.
Tebigy apatyň netijesinde azyndan 21 adam pida boldy, ýene-de birnäçe adam dereksiz ýiten diýip hasaplanylýar.
Iň agyr ýagdaý Guansi, Hubeý, Hunan we Guýçžou sebitlerinde ýüze çykdy.
Guansi sebitinde joşan sil suwlary içinde 15 sany oba hojalyk işgäri bolan ýük ulagyny derýa akdyrdy. Wakada 10 adam wepat boldy. Şeýle hem Guýçžouda 4 adam, Hunanda 4 adam we Hubeýde 3 adam heläk boldy.
Hytaýyň Meteorologiýa gullugy Szyansi, Anhoý, Hunan, Hubeý, Guýçžou, Guansi, Guandun welaýatlarynda we Haýnan adasynda ýokary derejeli howp ýagdaýyny yglan etdi. Häkimiýetler apatyň netijelerini aradan aýyrmak üçin 150 million ýuan serişde gönükdirdiler we birnäçe etraplarda adatdan daşary ýagdaý tertibini girizdiler.
Hubeý welaýatynyň Szinçžou şäherinde köçeleri suw basdy, köp sanly awtoulaglar tas dolulygyna suwuň aşagynda galdy. Sosial ulgamlarda ýerli ýaşaýjylaryň hut suw basan köçelerde balyk tutup duran pursatlarynyň wideolary ýaýrady.
Zabun howa şertleri birnäçe sebitlerde mekdepleriň, kärhanalaryň we ulag gulluklarynyň işini wagtlaýynça togtatmaga mejbur etdi.
Hubeý we Hunan welaýatlarynda müňlerçe adam howpsuz ýerlere göçürildi.
Meteorologlar ýakyn günlerde güýçli ýagyşlaryň ýurduň gündogar we günorta sebitlerine süýşjekdigini duýdurdylar. Täze sil we suw joşmalarynyň döräp biljek ýokary töwekgelçiligi sebäpli Ýanszy derýasynyň sebitine aýratyn üns berilýär.
