17-nji maýda garyşyk söweş sungaty boýunça MVP (Most Valuable Promotions) ligasynyň ilkinji ýaryşy geçirildi.
Agşamyň esasy wakasynda UFC-niň Şöhrat zalynyň agzasy we UFC-niň zenanlaryň arasynda ýeňil agramda öňki çempiony, amerikaly Ronda Rouzi öz watandaşy, Strikeforce titulynyň öňki dalaşgäri Jina Karano bilen duşuşdy.
Rouzä ýeňiş gazanmak üçin bary-ýogy 17 sekunt ýeterlik boldy.
Ol şowly teýkdaun amala aşyryp, derrew gol gaňryjy (armbar) usulyna geçdi. Karano boýun egmäge mejbur boldy.
Ronda Rouzi häzir 39 ýaşynda. Bu tutluşykdan soň onuň professional rekordy 13 ýeňiş (hemmesi möhletinden öň) we iki ýeňlişden ybaratdyr. Şeýle hem Rouzi dzýudo boýunça 2008-nji ýylyň Olimpiýa oýunlarynyň bürünç medalçysydyr. 43 ýaşly Jina Karano üçin bolsa, bu söweş 2009-njy ýylyň awgustyndan bäri MMA düzgünleri boýunça ilkinji çykyşy boldy. Onuň hasabynda indi ýedi ýeňiş we iki ýeňliş bar.
Maýk Perri vs Neýt Diaz
Ýaryşyň ähmiýeti boýunça ikinji tutluşygynda 77,3 kg çenli agramda ýene-de amerikaly söweşijiler duşuşdy: UFC-niň ýeňil agramdaky titulyň öňki dalaşgäri, 41 ýaşly Neýt Diaz we 34 ýaşly öňki UFC söweşijisi Maýk Perri.
Tutluşyk iki raunddan soň Perriniň ýeňşi bilen tamamlanyp, Maýk Diaza agyr şikesler ýetirdi.
Ikinji raunddan soň lukman Neýtiň ýüzündäki çuň kesigi bellige alyp, oňa söweşi dowam etdirmegi gadagan etdi.
2004-nji ýylda professional sporta ädim äden Neýt Diazyň hasabynda indi 21 ýeňiş we 14 ýeňliş bar. Söweş ýoluna 2014-nji ýylda başlan Maýk Perri bolsa öz rekordyny 15 ýeňşe we sekiz ýeňlişe çykardy.
Frensis Ngannu vs Filipe Lins
MVP ýaryşynyň üçünji esasy wakasynda UFC-niň agyr agramdaky öňki çempiony, kamerunly Frensis Ngannu we ýene bir öňki UFC söweşijisi, braziliýaly Filipe Lins oktagona çykdy. Tutluşyk birinji raundyň ahyrynda Ngannunyň garşydaşyny nokauta gidirmegi bilen tamamlandy.
"Ýyrtyjy" lakamy bilen tanalýan 39 ýaşly Ngannu üçin bu ýeňiş karýerasyndaky 19-njy ýeňiş boldy (18-si möhletinden öň).
Häzirki wagtda türgen MMA-da yzly-yzyna sekiz ýeňişli seriýasyny dowam etdirýär.
Öz gezeginde, Filipe Linsiň professional rekordy 18 ýeňşi (13-si möhletinden öň) we alty ýeňlişi öz içine alýar.
