Belli örküçli läheň Timminiň (Houp hem diýilýär) läşi Daniýanyň Anholt adasynyň kenarynda tapyldy diýip, «Der Spiegel» neşiri Daniýanyň Daşky gurşawy goramak agentligine salgylanyp habar berýär.
Bu läheňiň hut Timmidigini anyklamak 2-nji maýda Demirgazyk deňzine goýberilmänkä oňa dakylan GPS-trekeriň kömegi bilen mümkin boldy.
Mundan öň 12 metrlik läheň Germaniýanyň golaýynda, Baltika deňziniň ýalpak ýerlerinde birnäçe gezek ýüzüp bilmän galypdy. Ol her gezek öz güýji ýa-da adamlaryň kömegi bilen halas bolýardy. Aprel aýynyň ahyrynda — maýyň başynda ony barža ýükläp, Demirgazyk deňzine çykarmak kararyna gelindi. Onuň halas edilişine bütin dünýä syn edipdi.
Meklenburg — Öňki Pomeraniýanyň daşky gurşawy goramak ministri Till Bakhaus läheňiň heläk bolmagyna gynanç bildirip, bu çäräniň haýwana soňky mümkinçiligi bermek üçin edilen synanyşykdygyny belledi.
Nemes zoologlary läheňi Demirgazyk deňzine äkitmek başlangyjyny birnäçe gezek tankyt edipdi diýip, «Deutsche Welle» ýatladýar. Daniýanyň häkimiýetleri bolsa mundan öň, eger läheň kenara zyňylsa, oňa kömek etmejekdiklerini aýdypdy. Olar munuň «tebigy ýagdaýdygyny» belledi.
